Меланија Трамп е жена на 22-от век. Кога неодамна прошета низ централниот ходник на Белата куќа со хуманоиден робот, навести дека иднината повеќе не чука на врата, туку одамна пристигнала. Наклонетоста кон чудата на технологијата и сериозниот ангажман во таа област првата дама го потврдува и за време на посетата на кралот Чарлс и кралицата Камила.
Овој пат не се појави во друштво на некој дроид од трета генерација, туку на свој начин ги промовираше „Ray-Ban“ очилата, но – не „обични“.
Овие денови со Камила разговара за унапредување на образованието и виртуелната реалност, покажувајќи дека, покрај љубовта кон модата, негува и страст кон технолошките иновации. Меланија Трамп, која благодарение на своите одлични изданија би можела да им ги помати сметките на жестоките противници и официјално да се запише на листата на вечни модни икони, каде што веќе стојат имињата на Џеки Кенеди, Ненси Реган и Мишел Обама, вчера испроба аксесоар што на многумина не им падна веднаш в очи бидејќи беа зафатени со коментирање на шеширот, но сепак остави силен впечаток – очила за сонце.
Меланија и Камила го истакнаа заедничкиот приоритет: унапредување на развојот на децата. „Негување на иднината“ е сржта на агендата на првата дама на САД и проектот што неодамна го покрена на самит во Вашингтон, а за време на настанот на тениските терени на Белата куќа, уникатен спој на дипломатија и технологија, им се придружија и ученици од основно училиште со кои разговараа за предностите на VR слушалките.
Меланија во еден момент ги стави очилата „Ray-Ban Meta AI“, кои дадоа совршен „final touch“ на нејзиниот стајлинг. Верна на својот стил, се одлучи за бел костум од колекцијата на куќата „Ralph Lauren“, сламен шешир од брендот „Eric Javits“ и чевли „Manolo Blahnik“. Но, и очилата за сонце се дел од нејзината модна стратегија, важен аксесоар кој вешто го надградува секој аутфит.
Најчесто носи „Saint Laurent SL01“ со голема рамка, но сака и пилотски очила, популарните „авијаторки“, за класичен „All-American“ изглед. Беше само прашање на време кога ќе ја видиме и со паметни очила. Првиот модел на „Ray-Ban“ од ваков вид беше претставен пред неколку години, а во меѓувреме добија импресивни, некои би рекле и загрижувачки, функции на вештачка интелигенција.
Во леќата на „Display“ моделот, на пример, е вграден дисплеј со висока резолуција кој овозможува да гледате известувања, да добивате информации во реално време, да користите навигација, да преведувате текст, да слушате музика, да снимате фотографии и видеа и уште многу друго – сè целосно „hands free“, но во препознатливиот „Ray-Ban“ стил. Некогаш реквизит што го користеа шпиони (барем во филмовите), денес е достапен за сите по цена од 450 евра за стандардни опции, или 750 за понапредни варијанти.
Како ѝ прилегаат? Одлично. Иако имаше и такви кои забележаа дека Меланија Трамп одлично би се снашла и во улога на таен агент, особено кога очилата ги спушти на врвот на носот, со мистериозен поглед под ободот на шеширот...
