Американско-палестинската манекенка Бела Хадид откри на социјалните мрежи дека завршила во болница, предизвикувајќи загриженост меѓу нејзините обожаватели.
Имено, таа на својот Инстаграм профил сподели серија фотографии, а на една од нив манекенката лежи во болнички кревет, приклучена на инфузија и кислород.
„Жал ми е што често исчезнувам, ве сакам“, напиша таа.
Иако причината за нејзиниот престој во болница не е официјално потврдена, Хадид претходно зборуваше за својата долготрајна здравствена состојба. Во 2023 година, таа објави дека конечно е „здрава“ по повеќе од 100 дена интензивно лекување на Лајмска болест, хронични заболувања и дополнителни инфекции, со кои се бори речиси 15 години.
„Онаа мала јас што страдаше би била толку горда на возрасната јас затоа што не се откажав од себе“, напиша тогаш. Таа ѝ се заблагодари и на својата мајка, Јоланда Хадид, која цело време била покрај неа.
„Благодарна сум на мајка ми што ги чуваше сите мои медицински наоди, беше покрај мене, никогаш не ме напушти, ме заштитуваше, ме поддржуваше и, што е најважно, ми веруваше низ сето ова“, изјави Хадид.
Потсетуваме, Бела ја доби дијагнозата за Лајмска болест во 2012 година, а за својата борба првпат отворено зборуваше за магазинот „People“ во 2016 година, кога изјави:
„Животот не е секогаш онаков каков што изгледа однадвор. Најтешкиот дел од оваа борба е тоа што луѓето ве судат според изгледот, а не според тоа како навистина се чувствувате“, истакна таа.
