Ниски резерви, високи трошоци

Повеќето современи возила испраќаат предупредување за ниско ниво на гориво кога остануваат околу 5 до 10 литри, но тоа не значи дека сте безбедни да продолжите со возење уште еден час. Во моментот кога ќе се вклучи лампичката за резерва, горивото во резервоарот повеќе не доаѓа до моторот под идеален притисок, а пумпата за гориво почнува да влече не само течност, туку и нечистотии, талог и потенцијално влага од дното на резервоарот.

Со текот на времето, оваа нечистотија може да ги запуши филтрите, да ја оштети пумпата, па дури и да доведе до неправилно согорување во моторот. Кај дизелашите, ситуацијата е уште посериозна – присуството на воздух во системот поради празен резервоар може да предизвика дефект што бара одење во сервис и дополнително нарушување на системот.

Ризик што не вреди за неколку литри

Многу возачи во Македонија возат „на резерва“ од навика, сметајќи дека тоа е доволно за градските метежи, кратки релации или додека „не свртат до пумпа“. Меѓутоа, во ситуации кога ќе се случи неочекувано задржување во сообраќај, метеж на автопат, затворен пат или едноставно заборав, ризикот да останете без гориво расте. А кога тоа ќе се случи – не само што го блокирате сообраќајот, туку можете да добиете и казна.

Во зимски услови, проблемот станува уште поголем. Со малку гориво во резервоарот се зголемува ризикот од кондензација, односно создавање влага во системот, што може да доведе до замрзнување на цевките и застој во доводот на гориво. Во најлош случај, автомобилот нема да запали наутро кога ви е најпотребен.

Како да ја избегнете лошата навика

Експертите препорачуваат нивото на гориво во резервоарот никогаш да не падне под една четвртина. Ова не само што го продолжува животниот век на пумпата и другите компоненти, туку и го намалува ризикот од оштетување на моторот. Освен тоа, полн резервоар го намалува просторот за создавање на кондензација, особено кога температурите се ниски.

Иако цените на горивата варираат и секоја посета на пумпа може да изгледа како удар врз буџетот, трошокот за замена на пумпата за гориво или чистење на системот е многукратно поскап. Возењето со стабилно ниво на гориво не е луксуз – тоа е прашање на безбедност и грижа за возилото.

Возењето „на црвено“ не е заштеда, туку тивок дефект

Затоа, следниот пат кога ќе помислите дека можете уште неколку километри „на лампичка“, сетете се дека вашата пумпа за гориво можеби веќе влече нешто што не би требало. А ако автомобилот ве изневери токму кога сте во најголема брзање – таа заштеда од неколку литри ќе ве чини повеќе отколку што сте планирале.