Министерството за внатрешни работи на Австрија во моментов подготвува соодветна регулатива која ќе го овласти да ги затвори сите помали гранични премини. Како што јавија австриските медиуми, премините на кои не е можно да се спроведува постојана контрола ќе бидат затворени, додека главните премини ќе останат отворени.

Дополнително, на отворените премини ќе бидат спроведени дополнителни мерки, како што е поставување на антиепидемиски теписи.

Властите започнаа со програмата за мониторинг со цел да се спречи ширењето на инфекцијата во Австрија. Како дел од оваа програма, ќе се земаат мостри по случаен избор од фармите. Најавено е дека ќе бидат проверени 660 фарми во источна Австрија.

Австриската војска испрати единица за помош при катастрофи во Словачка на 26 март. Војниците помагаат во деконтаминација на областа и се очекува да останат во Словачка уште две недели.

Унгарија распореди војници

Унгарија, исто така, распореди војници и започна нови мерки за дезинфекција за да помогне во спречувањето на појавата на шап и лигавка во северозападниот регион, кој се граничи со Словачка и Австрија. Ова го изјави унгарскиот министер за земјоделство, Иштван Наѓ.

Унгарија го пријави својот прв случај на болеста по повеќе од 50 години на фарма за добиток на почетокот на минатиот месец, објави Ројтерс.

Од тогаш, соседна Словачка откри епидемии на пет локации, откако ги пријави првите случаи во март. Истовремено, Словачка ги засили мерките за спречување на ширењето на болеста.

Наѓ рече дека до утрово шап и лигавка биле откриени на уште две фарми во областа Џер-Мошон-Сопрон, што зафатило вкупно 3.500 говеда.

„Вложуваме максимални напори да спречиме дополнителни епидемии“, рече Наѓ во видеото на Фејсбук.

Сточниот фонд на Унгарија на крајот на декември 2024 година изнесуваше 861.000 грла врз основа на пописот на добитокот.

Што е шап и лигавка?

Шап и лигавка не е опасна за луѓето, но предизвикува треска и плускавци во устата на говедата, свињите, овците и козите. Претставува една од најопасните заразни болести на копитарите, вклучувајќи говеда, свињи, овци и кози.

Болеста брзо се шири преку директен контакт меѓу животните, но и преку заразени предмети, контаминирани возила, храна, вода и луѓе кои биле во контакт со заразени животни. Луѓето можат да го пренесат вирусот механички, односно преку раце, облека, превозни средства и слично. Болеста предизвикува големи економски загуби и бара најстроги контролни мерки, се вели во соопштението на српското Министерство за земјоделство, шумарство и водостопанство, кое додава дека во Србија не се потврдени случаи на оваа болест.

Болеста бара најстроги мерки за контрола, вклучувајќи:

• Убивање и безбедно отстранување на заразени и потенцијално заразени животни.

• Воспоставување зони за заштита и надзор околу заразената област.

• Забрана за движење на живи животни и производи од животинско потекло.

• Строги мерки за дезинфекција и контрола на движењето на луѓе и возила.