„Сигурни сме дека ќе бидеме сведоци на негативни ефекти врз производството“, изјави Софи Примас за телевизијата "RTL", нагласувајќи особена загриженост поради „сериозното“ влијание врз производството на вино и жестоки алкохолни пијалаци.

„Имаме широк спектар на алатки и подготвени сме за оваа трговска војна“, додаде таа, истакнувајќи дека ЕУ истовремено ќе разгледа како да ја заштити својата индустриска продукција.

ЕУ подготвува конкретен одговор

Примас го критикуваше пристапот на Трамп, нарекувајќи го „империјалистички став кој го имавме заборавено, но кој сега се враќа“, додавајќи дека Трамп се однесува како „господар на светот“.

Во средата, на ден кој го нарече „Ден на ослободувањето“, Трамп најави високи царини за речиси целиот свет, вклучително и 20% тарифи за увоз од Европската унија.

Два чекора на одмазда

Според Примас, ЕУ подготвува одговор во два чекора:

1. Првиот чекор, кој ќе биде објавен средината на април, ќе се однесува на алуминиум и челик.

2. Вториот чекор, кој треба да биде подготвен до крајот на април, ќе таргетира „сите производи и услуги од САД“, вклучително и онлајн услугите.

„Ќе ги нападнеме и услугите. На пример, онлајн услугите кои во моментов не се оданочени, но би можеле да бидат“, рече портпаролката на француската влада.

Освен тоа, ЕУ може да воведе забрана за пристап до договори за јавни набавки за американските компании, додаде Примас.

Француската влада реагира

Кабинетот на францускиот претседател Емануел Макрон соопшти дека тој денеска ќе се сретне со претставници на француските сектори погодени од царините на Белата куќа.