[ВИДЕО] Годишнина од трагичната смрт на проколнатиот поет, мајсторот на тагата и последниот боем на рок музиката

Точка

29/05/2024

19:44

4.104

Големина на фонт

а а а

На денешен ден во 1997 година, реката Мисисипи го однела животот на една од најсветлите ѕвезди на рок музиката, која, на жалење на сите љубители на рок музиката, престанала да свети порано отколку што требала.

Џеф Бакли е роден во Калифорнија, растејќи во сенката на трагедијата на својот татко, исто така, популарен кантавтор Тим Бакли, со кого Џеф имал комплициран однос.

Тие, наводно, се сретнале само еднаш, кога тој имал 8 години и 4 години пред смртта на Тим Бакли од предозирање.


Препознатлив по својот етеричен глас, Бакли важел за еден од најперспективните уметници на неговата генерација, особено по објавувањето на неговиот многу популарен деби албум „Grace“ од 1994 година.

Иако сега се смета за еден од класиците на рок звукот, во 1994 година Бакли бил „некул“, нешто како комбинација на Џејмс Блант и „Nickelback“.


Како и Курт Кобејн, кој починал во 1994 година, помладиот Бакли бил автентичен паднат ангел, бидејќи паѓал од самиот почеток, обидувајќи се да ја избегне судбината која неговите родители ненамерно му ја оставиле во аманет. Како и Кобејн, тој бил вистинска, а не кафеанска проколната душа. Бегал знаејќи дека нема каде да побегне и со тоа макар и претчувство, пеел силно, посилно од другите, чекајќи ја судбината - како што испаднало на крајот.


Ретко кој во светот на последната рок-револуција подобро владеел со бендот како со платно, како со свој филм, како своја театарска претстава која се изведува секоја вечер. Во љубовен однос со секој кој сакал да слуша, Бакли постојано се повикувал на љубов во сите облици, љубовта како желба, како откривање на себеси во другиот и другиот во себе, како пат кон нешто безумно ослободувачки. Љубовта како нешто што е возможно.


Кратката кариера на Џеф Бакли била обележана со талкања и непопустлива посветеност на својот израз. Тој ги изострил сетилата како и сите познати романтичари и бил впечатлив дел од климата која преовладувала во краткиот момент помеѓу гранџот и бритпопот.

Џеф ја насетувал својата трагична судбина во песната „Dream Brother“, која наводно говори за пријател на пејачот кој се подготвува да ги остави девојка си и нивното заедничко дете.

The dark angel he is shuffling in. Don’t be like the one who left behind his name. Asleep in the sand with the ocean washing over“ („Мрачниот ангел се прикрадува. Не биди како оној кој зад себе оставил само име, заспивајќи во песокот под океанот“).

Бакли починал во 1997 година, кога имал 31 година. Се верува дека се удавил при ноќно пливање. Некој одамна напишал: „Опиен од сетилата, мислел дека е пореален од светот. Мислел дека реката не му може ништо. Пејач и пливач кој мавтал од водата кон бродот кој поминувал, пред бранот да помине прек него“.

Светската слава ја стекнал постхумно, со изведбата на песната „Hallelujah“ од Леонард Коен.

 



Спонзорирани линкови

Маркетинг