Во новото издание на летниот подкаст на популарниот македонски јутјубер Стефан Лазаров, гостин беше претседателот на Македонскиот олимписки комитет и Претседател на Организацискиот комитет на ЕМОФ Скопје 2025, Даниел Димевски. Повод за разговорот беше неодамна завршениот Европски младински олимписки фестивал, кој за првпат се одржа во Македонија и претставува најголем спортски настан што досега се организирал во земјата.
Димевски уште на почетокот на разговорот истакна дека фестивалот претставува врв на неговата кариера и исклучително постигнување за македонскиот спорт.
„Тоа е чувство кое не се опишува. Горд сум што успеавме да организираме настан од вакви размери - 4300 учесници, 700 судии и делегати, над 200 ВИП гости и скоро 800 волонтери. Вкупно над 6000 луѓе беа дел од ЕМОФ Скопје 2025. Тоа е бројка што ја надминува и Медитеранските игри,“ истакна Димевски.
Според него, организацијата на фестивалот претставуваше „шанса која се случува еднаш во животот“ и симболично го постави македонскиот спорт на европската мапа.
На прашањето што точно доби македонскиот спорт од оваа манифестација, Димевски нагласи дека придобивките се длабоки и трајни.
„Над 180 македонски спортисти добија статус на олимпијци, што само по себе е огромно достигнување. Да се биде дел од една олимписка делегација е посебна чест. Тие деца ќе можат утре да кажат дека се натпреварувале со идните европски и светски шампиони.“
Во врска со тоа како Македонија доби можност да го организира овој настан, Димевски откри дека апликацијата првично била поднесена за ЕМОФ Скопје 2027, но по откажувањето на Хрватска, МОК бил поканет да ја преземе организацијата за 2025 година.
„Аплициравме во конкуренција со Истанбул и Букурешт, но со добро комуницирање и дипломатски договори, успеавме да се договориме - Турција и Романија да ги добијат идните настани, а ние да бидеме домаќини на ЕМОФ 2027. Кога Хрватска се повлече, ни беше понудено да го организираме настанот во 2025 година. Се подготвувавме само две години, но успеавме да го организираме на високо ниво“.
Во однос на спорните коментари и критики за условите во кои биле сместени дел од учесниците, Димевски објасни дека било планирано спортистите да бидат сместени во ново реновирани студентски домови, со средства од КФВ Банката, но промените во владата довеле до одложување на проектот.
„Идејата беше сите учесници да бидат сместени во домови со европски стандарди. Проектот беше одобрен, но по промената на власта и раководствата, реализацијата се одложи. Како и многу работи во нашата држава, политичките промени влијаеја и на ова.“
Димевски потенцираше дека без разлика на сите предизвици, ЕМОФ Скопје 2025 беше оценет со највисоки оценки од Европскиот олимписки комитет.
„Претседателот Спирос Капралос го оцени настанот како екстремно успешен и перфектно организиран. Тоа е најдобрата потврда дека испорачавме врвен спортски настан, што Македонија ќе го памети засекогаш“, потенцираше Димевски.
Целиот разговор можете да го погледнете на следниот линк:
