Спектакуларно музичко шоу, илјадници светла и море од луѓе го одбележаа настапот на светската диџејска ѕвезда Дејвид Гета на стадионот „Тодор Проески“ во Скопје. Со неговиот настап синоќа и официјално се заокружува големата прослава по повод 35 години независност на Македонија.
Уште од првите моменти беше јасно дека публиката ја очекува вистински спектакл. Сцената поставена пред источната трибина на стадионот беше претворена во огромен визуелен спектакл, со моќни светлосни ефекти и продукција карактеристична за големите стадионски настапи на францускиот диџеј.
Гета, кој во Скопје пристигна директно од Ибица, на публиката ѝ приреди енергично шоу, а атмосферата кулминираше уште на самиот почеток. Потсетувајќи се на својот прв настап во Македонија пред десет години, тој уште еднаш упати комплименти за земјава и за македонската публика.
„Македонијо, дали си подготвена?“, извика Гета од сцената, по што следуваше вистинска експлозија од светла, музика и овации. Илјадниците присутни го поздравија со огромен аплауз и врескање, а стадионот за момент изгледаше како огромна светлечка арена.
Пред големата ѕвезда, публиката ја загреваа македонските диџеи Семпре и Никифор, кои настапија на сцената поставена пред источната трибина. Со нивните сетови постепено се зголемуваше атмосферата и се подготвуваше теренот за главниот настап на вечерта.
Стадионот „Тодор Проески“ беше исполнет со десетици илјади посетители од Македонија, но и гости од странство кои пристигнаа во Скопје специјално за концертот. За голем интерес сведочеше и огромната гужва пред стадионот, каде што уште во попладневните часови почнаа да пристигнуваат посетителите.
Вратите беа отворени во 17 часот, но најголемиот бран публика пристигна во вечерните часови, особено околу 21 часот, кога првично беше најавен почетокот на настапот на Гета.
Интересот за концертот беше огромен и поради симболичната цена на билетите. Организаторите претходно најавија дека очекуваат околу 50.000 посетители, откако билетите беа пуштени во продажба по цена од само 35 денари.
Според последните информации од организаторот, до 19 часот биле заменети околу 40.000 влезници за нараквици, а рокот за нивна замена бил продолжен за уште еден час поради големиот интерес.
Со настапот на Дејвид Гета, Скопје синоќа беше во центарот на вниманието, а прославата на 35 години независност доби завршница во голем стил – со еден од најпознатите светски диџеи, десетици илјади луѓе и атмосфера која потсетува на најголемите европски музички фестивали.
За Гета, ова не е прва средба со македонската публика. Неговиот настап пред десет години остави силен впечаток, а враќањето во Скопје беше дочекано со еднакво голем ентузијазам.
Музиката, светлосните ефекти и огромната публика го претворија стадионот во вистинска концертна арена, а вечерта посветена на 35 години независност заврши со ритамот на еден од најголемите имиња на светската електронска музичка сцена.
