Само во 2022 година, од последиците на овие заболувања починале 19 милиони луѓе ширум светот. Иако генетиката игра важна улога, одлуките што ги носиме во кујната можат значително да го намалат или зголемат ризикот од срцеви заболувања.

Здравјето започнува со избалансирани оброци подготвени дома, но не треба да внимаваме само на намирниците, туку и на садовите што ги користиме. Истражувањата покажале дека внесувањето токсични честички, како што е микропластиката, може да биде поврзано со поголем ризик од срцев и мозочен удар, пишува „EatingWell“.

„Секогаш размислувам за тоа како малите секојдневни избори влијаат врз долгорочното здравје“, вели д-р Елизабет Клодас, кардиолог и основач на „Step One Foods“.

„Тоа не го вклучува само она што го јадеме, туку и начинот на кој храната ја складираме и подготвуваме. Клучно е здравите навики да бидат едноставни, пријатни и да имаме доверба дека алатките што ги користиме ни помагаат, а не ни одмагаат во постигнувањето на целите“, додава Елизабет.

Врз основа на овие сознанија, двајца искусни кардиолози, д-р Клодас и д-р Арон Феинголд, шеф на кардиологија во Универзитетскиот медицински центар „JFK“, споделија совети за тоа кои предмети во кујната би било добро да се заменат за подобро здравје на срцето.

Тавите со нелеплив слој заменете ги со не’рѓосувачки челик или леано железо

Според д-р Феинголд, премазите што содржат хемикалии „PFOA“ и „PTFE“ „можат да испуштаат токсични испарувања и честички кои можат да придонесат за кардиоваскуларни воспаленија“.

Наместо такви садови, тој препорачува потрајни алтернативи, како што се садови од леано железо или не’рѓосувачки челик.

Дрвени даски за сечење наместо пластични

„Сечењето на пластични даски може да создава микропластика, односно ситни честички што можат да се залепат за храната и така да завршат во организмот. Овие честички се пронајдени во човечки ткива, вклучително и во мозокот, а иако сè уште не ги разбираме целосно нивните последици врз здравјето, првичните истражувања сугерираат дека можат да бидат штетни на клеточно ниво“, вели д-р Клодас.

„Јас користам дрвени даски за сечење, кои се побезбедни, поиздржливи и подобри за нашето тело и животната средина.“

Фритеза на топол воздух наместо класична фритеза

Д-р Феинголд предупредува дека пржењето во длабоко масло и подготовката на храна со големи количини масло на високи температури може да создаде трансмасни киселини и соединенија што поттикнуваат воспаление на артериите.

Доколку ваквите јадења се редовен дел од вашата исхрана, исплатливо е секојдневната подготовка на оброци да ја префрлите на фритеза на топол воздух.

Тоа не значи дека никогаш повеќе не смеете да јадете пржено пилешко или домашни крофни, туку дека во нив треба да уживате умерено. Рерните со функција за фритеза на топол воздух нудат поинаков начин на подготовка на храната што бара помалку масти.

Стаклени садови наместо пластични

Експертите предупредуваат на влијанието на пластичните садови за храна, особено постарите кои содржат „BPA“, односно бисфенол А, хемикалија што може да го наруши функционирањето на хормоните.

Покрај тоа, пластичните садови со текот на времето можат да ослободуваат микропластика, особено кога се изложени на топлина.

„Загревањето храна во пластика може да ослободи „PFAS“, хемикалии поврзани со срцеви заболувања, одредени видови рак и нарушување на имунолошкиот систем. Наместо тоа, користам стаклени садови. Тоа е едноставна промена што се вклопува во пошироката слика на здравиот живот“, вели д-р Клодас.

Соларници што овозможуваат прецизно дозирање

Уште еден аспект на кој треба да се внимава поради крвниот притисок и здравјето на срцето е внесот на натриум.

Д-р Феинголд препорачува користење соларници што овозможуваат прецизно дозирање за да бидете посвесни колку сол внесувате.

За дополнителна корист, солта можете да ја комбинирате со антиинфламаторни зачини како бибер, ѓумбир и куркума, како и со билки како рузмарин, за да го засилите вкусот на храната и да ги зголемите нејзините здравствени придобивки.

Острите ножеви се клучни за безбедна подготовка на храната

„Ова можеби изгледа помалку очигледно, но користењето тапи ножеви ја прави подготовката на храната потешка, пофрустрирачка и поопасна“, вели д-р Клодас.

„Мора да примените поголема сила, што го зголемува ризикот од лизгање на сечилото и повреди. Кога готвењето е полесно и побезбедно, поголема е веројатноста да подготвувате оброци од целосни намирници кои се добри за срцето.“

Доколку веќе имате добар нож, редовно острете го со острилка. Ако немате, размислете за инвестирање во нов, квалитетен готвачки нож.