Ивона Јо искрено и без задршка проговори за еден важен дел од своето минато – односот со пејачката Тамара Волческа, со која некогаш делеше не само сцена и пријателство, туку и заеднички дом и секојдневие. Во емотивно навраќање на тие години, таа откри дека нивната врска била многу повеќе од обично другарство – станувало збор за длабока блискост, разбирање и поддршка, кои оставиле силен печат во нејзиниот живот.
Иако времето ги одвело на различни патишта, спомените од тој период и понатаму носат топлина и почит. Ивона не крие дека тие моменти биле значајни за нејзиниот личен и професионален раст, нагласувајќи дека секоја врска, без разлика како ќе заврши, носи свои лекции.
Во разговорот за емисијата „Равенка за успех“, таа се осврна и на неодамнешната јавна честитка од Тамара по повод нејзината свршувачка, истакнувајќи дека не обрнува внимание на туѓите толкувања и коментари. Според неа, луѓето секогаш ќе имаат мислење, но вистинската вредност е во тоа да се зачува сопствениот мир и достоинство, без оглед на надворешните влијанија.
✨„Сфатив дека дали ќе носиш црно или бело, дали ќе стоиш на раце или на нозе, луѓето секако ќе зборуваат. Што побрзо ги оттурнеш мислењата на луѓето од твојот живот, толку посреќен ќе бидеш“, вели Ивона.
Таа не крие дека Тамара зазема посебно место во нејзината животна приказна и го опиша нивниот однос како период во кој биле неразделни, споделувајќи интимни и значајни моменти што ги обликувале како личности.
✨„Тамара беше и остана во моето срце човек, људина која беше присутна добри три години во мојот живот. Споделувавме прекрасни моменти, ми беше голема поддршка во периодот додека течеше животот за нас двете“, искрена е пејачката.
За тоа што всушност довело до крај на нивното заедничко патување, Ивона објаснува дека станува збор за природен процес на созревање и промена на животните приоритети.
✨„Во моментот кога патиштата ни се разделија, како што милува и таа да каже, едноставно одлучивме тоа да биде тоа. Јас да продолжам по мојот пат, таа по нејзиниот. Клучни беа различните гледишта на нештата, различните ставови, потреби во животот и емотивни барања во тој момент“, заклучува таа.
Во февруари, еден месец по запросувањето, Ивона Јо се венча со саканиот Кристијан Тодоров. Таа се фотографираше облечена во бело со букет од кали, а Кристијан во раката држи извод од матичната книга на венчаните.
✨„Веќе не се двајца, туку едно. Тоа што Бог го споил заедно, никој човек да не го раздели“, напиша пејачката тогаш.
