Македонија е земја во која што шест квартали по ред економијата има стабилен раст, оцени на денешната прес-конференција Бојан Стојаноски, пратеник на ВМРО-ДПМНЕ.
Особено е важно, додаде тој, да се види што стои зад овој раст.
Како што оцени, најголем придонес има во градежништвото, кое во последниот квартал од минатата година забележало раст од 14,6 проценти. Тоа, според него е највисока стапка на раст меѓу сите економски сектори и јасно покажува дека инвестициите и инфраструктурата се двигател на економската активност.
„Градежништвото е еден од секторите со најголем мултипликативен ефект.
Што значи ова во пракса?
Тоа значи повеќе градилишта, повеќе инфраструктурни проекти, повеќе работа за градежните компании и повеќе ангажман за домашната индустрија.
Кога расте градежништвото, растат и транспортот, производството на материјали, трговијата и услугите. Со други зборови, градежништвото е сектор кој повлекува повеќе други сектори во економијата.
И токму затоа е важно што овој тренд не само што продолжува, туку и се засилува.
Со други зборови, секторот има двегодишен силен раст“.
Според податоците на Министерството за финансии, како што информира, во првите два месеца од 2026 година реализацијата на капиталните инвестиции бележи трицифрен раст, односно значително зголемување во однос на истиот период минатата година.
„По растот од 3,8% на БДП и 14,6% во градежништвото во последниот квартал од 2025, сега во 2026 гледаме и трицифрен скок од 179,7% во реализацијата на капиталните инвестиции – што значи дека економскиот мотор не застанува, туку се засилува.
Со други зборови, растот на градежништвото што го видовме во 2025 година не е случајност, туку резултат на активни инвестиции коишто продолжуваат и во 2026 година.
За граѓаните ова значи нешто многу едноставно: повеќе инвестиции во патишта, инфраструктура и објекти, повеќе економска активност и повеќе можности за работа за компаниите.
Нашата цел е јасна – економски раст кој се темели на инвестиции, инфраструктура и реална економска активност“.
