Јуинг минатиот викенд во легендарниот „Медисон Сквер Гарден“ го шокираше фаворизираниот Малколм Велмејкер. Иако борбата ја прифати во последен момент како замена, одржа доминантен настап и славеше со едногласна одлука на судиите, стекнувајќи преку ноќ војска нови обожаватели.

Иако нивниот судир беше очигледен кандидат за „Борба на вечерта“, претседателот на "UFC", Дејна Вајт, изненади со тоа што не им додели бонус од 50.000 долари. Токму тоа е веројатно и главната причина поради која Јуинг веќе оваа недела мораше да се врати на физичка работа.

Дочек на градилиштето

Во четврток на интернет почна да кружи снимка што го прикажува враќањето на Јуинг на работа. Додека борецот, со прекар "Professor Finesser", влегуваше на градилиштето, колегите го дочекаа со овации, аплауз и честитки.

Надвор од октагонот, Јуинг работи како експерт за безбедност во градежната индустрија. Заедно со својот татко во Калвер Сити, Калифорнија, е сопственик на консултантската компанија „Occusafe Network“. Со години успешно го усогласуваше напорниот труд со професионалната кариера, а долготрајните работни часови често ги користеше како мотивација да тренира уште посилно и да успее во кафезот.

Откако ги загуби првите две професионални борби, Јуинг — сега со скор 9-2 — врза девет победи по ред, од кои дури седум со нокаут. Иако оваа недела се врати на работа, замавот што го доби сугерира дека нема уште долго да остане на градилиштето, пишуваат порталите што ги следат боречките спортови.