Облечени во најдобри одела и вратоврски, со цилиндри накривени кон камерата, овие мажи и жени изгледаат како да позираат за скапи портрети. Но, зад нивниот уреден изглед се кријат луѓе кои извршиле некои од најмрачните злосторства со кои тогашната полиција се соочувала.
Ова се фотографии на австралиски осуденици кои полицијата ги евидентирала поради морничави убиства, грабежи, провали и други злосторства за време на дваесеттите и триесеттите години од минатиот век. Музејот на правдата и полицијата во Австралија објави 2.500 фотографии на жени и мажи криминалци од дваесеттите години.
Сликите на убијци, бигамисти, криумчари на алкохол и проститутки нудат фасцинантен увид во животот во Австралија на почетокот на 20. век.
Овие „специјални фотографии“ најчесто настанувале во ќелиите на Централната полициска станица во Сиднеј и, како што објаснува кустосот Питер Доjл, прикажуваат „луѓе и жени штотуку собрани од улица, често сè уште вознемирени од драмата на апсењето“.
Доjл смета дека, за разлика од обичните затворски фотографии, „субјектите на специјалните фотографии веројатно имале дозвола, можеби и покана, самите да заземат поза и да го обликуваат својот портрет како што сакаат. Нивниот фотографски идентитет така настанувал преку спој на вродени особини, лична историја, навики и карактеристични гестови, сопствен стил (фризура, облека, додатоци) и физички карактеристики.“
Самите фотографии се од исклучителен квалитет, добро компонирани и во многу случаи имаат уметничка вредност.
Алберт Стјуарт Ворнкин е наведен во полицискиот гласник на Нов Јужен Велс од 10 ноември 1920 година како обвинет за обид за обљуба на осумгодишно девојче. За извесен Бојтлер, чија фотографија е означена како „намерно и опсцено разголување“, нема понатамошни забележани податоци.
Фотографијата, како што се претпоставува, е направена по рацијата што ја предводел шефот Бил Мекеј, подоцна комесар на полицијата, во куќа на адреса Рајли стрит бр. 74, во долниот Дарлингхурст. Против 15-те уапсени мажи и жени биле водени бројни постапки. Тоа била куќа што често ја посетувале „озлогласени крадци“.
Еве како изгледале останатите фотографии на уапсените луѓе.
