Властите во Малезија спроведуваат голема акција против сопственици на луксузни и егзотични автомобили кои ги прекршуваат сообраќајните прописи. Во рамки на операцијата „Луксуз“ запленети се дури 258 возила со висока вредност поради низа прекршоци – од неважечко осигурување до лажни регистарски ознаки, пренесува „carscoops.com“.
Иако се очекува сопствениците на вакви автомобили да имаат беспрекорна документација, практиката во Малезија покажува поинаку. Кампањата „Операција Луксуз“ е насочена кон возила без валидно осигурување, со истечени возачки или сообраќајни дозволи, како и со фалсификувани регистарски таблички или несоодветни броеви на шасија.
Малезискиот Оддел за патен сообраќај (JPJ) досега спроведе три бранови заплени: 101 автомобил е одземен на 24 јуни, уште 53 на 1 август и дополнителни 104 возила на 10 август.
Од „Ferrari“ до „Rolls-Royce“
Меѓу запленетите возила има навистина импресивни примероци. Се издвојуваат зелен „Lotus Elise“, жолт „Lamborghini Huracan STO“, црн „Rolls-Royce Cullinan“, жолт „Lamborghini Urus“, мат сив „Aston Martin DBX“ и црвен „Ferrari 458 Italia“.
Фотографиите кои JPJ ги сподели на социјалните мрежи прикажуваат и повеќе модели на „Porsche“, меѓу кои „Cayman“, „Cayenne“, „911“ и „Panamera“, како и неколку премиум модели на „Toyota“ како „Land Cruiser“ серија 300, „Alphard“ и „Vellfire“. Листата ја дополнуваат бројни лимузини и купеа од „BMW“ и „Mercedes-Benz“.
Туан Мухамад Кифли бин Ма Хасан, висок директор за спроведување на законот во JPJ, изјави дека сопствениците биле известени и повикани да ги исправат неправилностите пред возилата да им бидат одземени. Најголем број заплени – 93 – се случиле во Куала Лумпур, а во три случаи автомобилите ги возеле странци без платена патарина и без важечко осигурување.
Од одделот порачаа: „Спроведувањето на Операцијата Луксуз испраќа јасна порака дека JPJ нема да толерира ниту една страна која не ги почитува сообраќајните правила. Поседувањето луксузно возило не е изговор за игнорирање на одговорностите како легален учесник во сообраќајот.“
Високи даноци и продолжување на акцијата
Според „New Straits Times“, властите идентификувале над 1000 случаи на сопственици кои подолго време не ја обновиле патарината и осигурувањето – меѓу нив и познати личности и бизнис тајкуни. Во Малезија, даночниот режим за луксузни возила е исклучително висок и може да ја зголеми нивната продажна цена за три пати.
Покрај увозната царина од 30%, данокот на промет изнесува 10%, а акцизата 105%. За возила поскапи од приближно 47.200 американски долари, се плаќа и дополнителен данок на стоки со висока вредност. JPJ најави дека Операцијата Луксуз ќе продолжи редовно, а добрата вест за сопствениците е што, според локалните медиуми, повеќето возила се враќаат откако ќе се подмират сите даноци и осигурувањето.
