Во ерата на „cloud“ технологијата и брзите "SSD" дискови, „floppy“ дискетата претставува технолошки реликт од едно одамна минато време. Многу припадници на генерацијата "Z" не знаат дека токму според нејзиниот изглед е создадена иконата за зачувување документи, а уште помалку за што некогаш служела. Иако денес се користи сѐ помалку, овој медиум за складирање податоци сѐ повеќе станува куриозитет.

Единствен предизвик

Еден ентузијаст и јутјубер реши да се зафати со предизвикот – да создаде целосно функционална „floppy“ дискета „од нула“, користејќи алати и материјали достапни во домашни услови. Во детален видео приказ, авторот познат само како „polymatt“ ѝ ја доближи на својата публика комплексноста на процесот што стои зад овој, некогаш сеопфатен, медиум за складирање.

Проектот започнал со темелна анализа на оригиналниот диск, каде секој негов дел – од заштитниот капак и лизгачкиот механизам, до внатрешната ткаенина за чистење – бил прецизно измерен за да се создаде верен 3D модел. Наместо пластика, основата на неговиот диск била изработена од алуминиум. Со помош на CNC машина, тој изработил цврсто куќиште – првиот во низата комплексни чекори.

Најголем предизвик била изработката на самиот магнетен медиум, односно тенкиот филм на кој се запишуваат податоците. По неуспешните обиди со механичко сечење, авторот се свртел кон ласерска технологија за прецизно обликување на PET фолијата, која служи како подлога. Фолијата била и термички обработена за да се осигура совршена рамнина – клучна за правилно функционирање на медиумот.

Успех со многу труд

Вториот голем предизвик била изработката на магнетната суспензија. Авторот експериментирал со мешање на црн железен оксид и различни врзувачки раствори, за да создаде премаз кој може рамномерно да се нанесе на PET фолијата во исклучително тенок слој. Конечно успеал да ја постигне саканата дебелина, иако првите прототипови имале очекувани проблеми – од грешки во дизајнот на куќиштето што го попречувале вртењето на дискот, до лупење на нанесениот магнетен слој.

По низа итерации, исправки и усовршување на формулата, крајниот резултат бил успешен – јутјуберот успеал во домашна радионица да изработи дискета на која е можно да се запишат податоци. Со специјализиран алат ги визуализирал магнетните траги на површината на дискот, со што практично докажал дека успеал во намерата. Иако изработениот диск не бил доволно прецизен за сигурно читање комплексни датотеки, проектот ја исполнил својата цел – да покаже дека со доволно знаење, љубопитност и упорност е можно да се реплицираат комплексни технологии од минатото.

Фасцинантно деталниот проект е документиран во мошне интересен видео запис: