Канаѓанката Ешли Кинг ги предупредува корисниците на социјалните мрежи откако за време на одмор го изгубила видот поради отровен коктел, истакнувајќи дека е меѓу ретките среќници кои преживеале.
Во декември, седум туристи завршиле во болница на Фиџи откако во луксузно одморалиште испиле заразен алкохолен пијалак. Само еден месец претходно, шест млади патници починале во Лаос под речиси идентични околности. Секоја година илјадници луѓе страдаат или се разболуваат тешко затоа што несвесно консумираат алкохол измешан со метанол, пишува „New York Post“.
„По мирис и вкус не се разликува од алкохолот што обично го пиеме“, раскажала Кинг, која останала без вид откако за време на патување на Бали испила еден пијалак.
Метанолот е проѕирна, запалива течност чиј мирис потсетува на етанол, неговиот „пивлив“ роднина, но е исклучително отровен.
„Само 30 милилитри, една мала чашка, може да ве убие, а 15 милилитри можат да предизвикаат слепило, откажување на органите, тешки оштетувања на црниот дроб и мозокот“, предупредува Кинг.
Оваа хемикалија се користи во бројни индустриски и домашни производи како бензин, антифриз, разредувач за бои и течности за бришачи. На црниот пазар, особено во земјите во развој, метанолот често се додава во нелегален алкохол за да се зголеми количината и профитот. Таквиот отровен микс завршува во барови и хотели, каде што несреќните гости го консумираат.
На Кинг ѝ се случило тоа во 2011 година, кога со пријателка го посетила Бали пред почетокот на студиите. Во луксузен бар нарачала коктел со вотка.
„Ништо не беше различно од која било друга вечер“, се сеќава таа. Следниот ден се чувствувала мамурно, но првиот сериозен знак дека нешто не е во ред се појавил дури два дена подоцна во Австралија.
„Се сеќавам дека разговарав со цариниците и звучев како да сум пијана. Не можев да составам кохерентна реченица“, рекла таа.
По пристигнувањето на Нов Зеланд, заспала во хотелската соба. Кога се разбудила, ѝ се чинело дека просторијата е целосно темна, но не била. Го изгубила видот и имала проблеми со дишењето. Анализите на крвта во болницата покажале висока концентрација на метанол. Лекарите биле шокирани што воопшто преживеала.
„Губењето на видот е најтешката работа што ми се случила, со тоа се борам секој ден“, споделила таа на социјалните мрежи.
Метанолот во организмот се претвора во формалдехид и мравја киселина, исклучително отровни супстанции кои предизвикуваат опасно закиселување на крвта. Раните симптоми личат на пијанство: вртоглавица, гадење, повраќање и поспаност. Меѓутоа, во рок од 12 до 24 часа, состојбата може да се влоши до слепило, напади или кома. Во некои случаи, потешките симптоми се појавуваат дури по три дена. Институтот за метанол нагласува дека труењето може да се лекува ако се реагира во првите 10 до 30 часа.
Парадоксално, понекогаш консумирањето обичен алкохол може да помогне, бидејќи го забавува претворањето на метанолот во отровни метаболити. За време на лекувањето, Кинг во болницата добивала вотка со сок од портокал.
„Тоа беше најапсурдната работа, колку повеќе бев пијана, толку подобро дишев и малку појасно гледав“, раскажала таа.
Покрај тоа, поминала низ хемодијализа и терапија со стероиди, но ѝ останале само околу 2 отсто од видот, кој го опишува како „снег на ТВ-екран“.
„Пред три дена имав цел живот пред себе, а сега ми велите дека сум слепа?“, се сеќава на моментот кога ја слушнала дијагнозата.
Проблемот е глобален, но најмногу случаи на труење со метанол се забележани во Азија, особено во Индонезија, Индија, Камбоџа, Виетнам и Филипините. Од 2019 година, „Лекари без граници“ регистрирале над 1.000 инциденти и околу 14.200 смртни случаи, со стапка на смртност од 20 до 40 отсто.
Американската амбасада во Јордан неодамна издаде предупредување и препораки за заштита:
• Купувајте алкохол само во лиценцирани продавници и проверени барови.
• Избегнувајте улични продавачи и неформални места.
• Ако пијалакот е невообичаено евтин, веројатно е фалсификат.
• Не прифаќајте бесплатни пијалаци од непознати лица.
• Набљудувајте како се подготвува пијалакот; ако забележите чуден мирис или вкус, веднаш отфрлете го.
• Не оставајте го пијалакот без надзор.
• Претпочитајте пиво, вино и пакувани пијалаци.
• Проверете ги шишињата пред отворање; скршени печати, лоши етикети или правописни грешки можат да бидат знак за лажен производ.
• Следете ги локалните вести и пријавете се за патни предупредувања од амбасадите.
„Ова не мора да се случува, но се случува. И премалку луѓе знаат за оваа опасност. Затоа ја споделувам мојата приказна“, порачува Кинг. Таа започнала и петиција на платформата „Change.org“ за да се подигне свеста и да се воведе едукација за ризиците од отровен алкохол во училиштата и на аеродромите.
