Советниците на Доналд Трамп јавно и приватно даваат предлози за ставање крај на војната во Украина, што би ѝ отстапило големи делови од таа земја на Русија во догледна иднина, без членство во НАТО, според анализата на Ројтерс на изјавите и интервјуата со луѓе блиски до новоизбраниот претседател на САД.
Предлозите на тројца клучни советници, вклучувајќи го и идниот претставник на Трамп за Русија и Украина, пензионираниот генерал-полковник Кит Келог, споделуваат некои елементи, вклучително и ставање крај на можноста на Украина за членство во НАТО.
Советниците на Трамп ќе се обидат да ги натераат Москва и Киев да преговараат. Доколку Киев не се согласи на преговори, би ја прекинале воената помош, но би ја зголемиле доколку рускиот претседател Владимир Путин одбие да преговара.
Трамп повеќе пати вети за време на неговата кампања дека ќе стави крај на речиси тригодишниот конфликт во рок од 24 часа од неговата инаугурација на 20 јануари, ако не и порано, но сè уште не кажа како.
Аналитичарите и поранешните претставници на националната безбедност се сомневаат дека Трамп може да го исполни тоа ветување поради сложеноста на конфликтот.
Изјавите на советниците на Трамп укажуваат на неговиот мировен план.
Украинскиот претседател Володимир Зеленски, соочен со недостиг на војници и растечки загуби на територија, изјави дека е подготвен да преговара.
Иако тој сè уште сака членство во НАТО, тој оваа недела рече дека Украина мора да најде дипломатски решенија за да ги врати окупираните територии.
Но, Путин можеби нема да сака да учествува, рекоа аналитичарите и поранешните американски функционери, со оглед на тоа дека ќе добие повеќе ако продолжи со грабежот на земјата.
„Путин не брза“, рече Јуџин Румер, поранешен врвен американски разузнавачки аналитичар за Русија, кој сега е во тинк-тенкот „Карнеги фонд за меѓународен мир“.
Тој рече дека рускиот лидер не е подготвен да отстапи од неговите услови за примирје и преговори, вклучително и условите Украина да се откаже од членството во НАТО и да предаде четири покраини за кои Путин тврди дека се дел од Русија, но не ги контролира целосно, што Киев одби.
Путин, рече Румер, најверојатно ќе заплени уште земја и ќе чека да види какви отстапки ќе понуди Трамп за да го намами во преговори.
Ројтерс во мај објави дека Путин е подготвен да ја заврши војната со договорен прекин на огнот со кој се признаваат сегашните линии на фронтот, но дека е подготвен да ги продолжи борбите доколку Киев и Западот не одговорат.
Русија веќе го контролира целиот Крим, откако еднострано го одзеде од Украина во 2014 година и оттогаш зазеде околу 80 отсто од Донбас, како и повеќе од 70 отсто од Запорожје и Херсон и мали делови од регионите Миколаев и Харков.
Трамп сè уште не свикал централна работна група за да развие мировен план, според четворица советници кои зборуваа под услов да останат анонимни за да ги опишат приватните размислувања. Наместо тоа, неколку советници ги пренесоа идеите на јавни форуми, а во некои случаи и на Трамп, велат тие.
Мировниот договор најверојатно ќе зависи од директниот личен ангажман меѓу Трамп, Путин и Зеленски, велат советниците.
Портпаролот на Кремљ Дмитриј Песков рече дека „не може да коментира поединечни изјави без да знае каков е планот во целина“.
Портпаролката на Трамп, Керолин Левит, истакна дека Трамп рекол дека „ќе стори сé за да го врати мирот и да ја обнови американската сила“.
Таа не одговори на прашањето дали новоизбраниот претседател сè уште планира да го реши конфликтот веднаш по преземањето на функцијата.
