Големите батериски системи ѝ помагаат на Бугарија да ја искористи сончевата енергија и по зајдисонцето. Земјата се претвора во важен снабдувач на регионалниот пазар, но зимата носи нов предизвик.
Бугарија сè посилно ја презема улогата на „батерија на Балканот“: електричната енергија од сончевите централи се складира во текот на денот, а се испорачува кога расте вечерната побарувачка.
Како што пренесува Reuters во анализата од 23 октомври, земјата годинава ја удвоила моќноста на батериските системи од три на околу шест гигавати, со поддршка од 700 милиони евра европски грантови. Тоа ѝ помогнало да ги снабдува соседните пазари и во текот на летните горештини.
Сонцето се користи и по зајдисонцето
Батериите го менуваат начинот на користење на соларната енергија. Наместо целото производство да се понуди на пазарот во часовите со многу сонце, дел се чува за подоцна, кога струјата е попотребна.
Порталот Balkan Green Energy News, повикувајќи се на здружението APSTE и податоци од бугарскиот оператор ESO, објави дека нето-извозот на електрична енергија пораснал за 62 проценти од почетокот на годината до почетокот на октомври. Извозот достигнал 3,5 терават-часови, наспроти 2,16 во истиот период лани.
До 4 октомври, големите батериски системи испорачале 1.720 гигават-часови во електроенергетскиот систем, повеќе од деветпати над минатогодишните 190 гигават-часови. Овие бројки ја покажуваат испорачаната енергија, додека гигаватите ја означуваат моќноста на системите.
Зимата останува тест
Сепак, APSTE предупредува дека сончевите централи и батериите сами не се доволни: зимското производство од сонце се намалува, а потрошувачката расте. Здружението затоа бара побрз развој на ветерните електрани, кои можат да го надополнат сончевото производство во постудените месеци.
Во анализа на NetZeroLab при Софискиот универзитет од 14 октомври се нагласува и дека европските споредби бараат внимание: достапните национални податоци понекогаш мешаат оперативни, најавени и планирани проекти. Затоа рангирањата треба да се читаат внимателно, со проверка на датумот и статусот на капацитетите.
Кавер: архивска фотографија на соларна централа во Бугарија од 2011 година. Фото: Edal Anton Lefterov / Wikimedia Commons, CC BY-SA 3.0. Кадрирана и намалена за Точка.
.JPG){kind=link}
