Ал Наср на спектакуларен начин стигна до третата победа во новата сезона од шампионатот на Саудиска Арабија, откако на гостувањето кај Ал Етифак славеше со 3:2, иако во текот на првото полувреме имаше два гола негатива и играч помалку.
Уште во 12. минута гостите се најдоа во голем проблем. Бенто доби директен црвен картон, па Ал Наср практично целиот натпревар мораше да го одигра со десетмина фудбалери. Домаќинот успеа да ја искористи бројчаната предност и да постигне два гола пред заминувањето на одмор. Мрежата на гостите ја затресоа Ондреј Дуда и Алваро Мердан, па изгледаше дека Ал Етифак има отворен пат кон победата.
Сепак, на полувремето следуваше големо изненадување. Тренерот на Ал Наср, Анге Постекоглу, одлучи Кристијано Роналдо да го остави во соблекувалната, а на негово место на теренот да го испрати Абдулах Ал Хајбари. Таквата одлука очигледно не ѝ се допадна на португалската ѕвезда, но се покажа дека гостинскиот тим во продолжението успеа целосно да го промени текот на натпреварот.
Веќе по осум минути игра во второто полувреме, Садио Мане ја затресе мрежата, но неговиот гол беше поништен поради офсајд. Сенегалецот, сепак, не се откажа.
Cristiano Ronaldo was furious after being substituted, but Ange Postecoglou’s decision was ultimately vindicated as Al-Nassr came from 2-0 down with 10 men to win 3-2. 🤯 pic.twitter.com/nFhyCzg07S https://t.co/4Z1s0y49Jm
— Football Tweet ⚽ (@Footballtweet) August 26, 2026
Ал Наср конечно ја намали негативата во 74. минута. Жоао Феликс го пронајде Мане, кој погоди за 2:1 и најави драматична завршница. Само три минути подоцна, Феликс повторно беше во улога на асистент, овојпат за Абдулелах Ал Амри, кој го израмни резултатот на 2:2.
Целосниот пресврт се случи во 90. минута. Сами Ал Наџеи го проигра Мане, а Сенегалецот со својот втор гол на натпреварот му донесе голема победа на Ал Наср – 3:2.
Екипата од Ријад така го задржа максималниот ефект по три кола и се наоѓа на врвот на табелата, додека Ал Етифак го претрпе првиот пораз и со шест бода ја зазема шестата позиција.
Ал Наср во следното коло на домашен терен ќе го пречека Ал Тавон, додека на Ал Етифак му следува уште еден натпревар пред своите навивачи, против Ал Диријах, за кој меѓу стативите брани Никола Васиљ.
