Промената на навиките во исхраната може да има важна улога во регулирањето на холестеролот, а кардиологот д-р Оливер Гутман од лондонската болница „The Wellington“ издвои една намирница која особено добро се вклопува во исхраната за здраво срце. Станува збор за авокадото, кое изобилува со незаситени масти, растителни влакна, витамини и минерали.
Што треба да промените во исхраната
Кај покачен холестерол важно е да се намали внесот на храна богата со заситени масти и почесто да се избираат намирници кои содржат незаситени масти.
„Исхраната нека се темели на овошје, зеленчук, интегрални житарки и немасни извори на протеини. Намалете го внесот на заситени и трансмасти, кои ги има во масното месо, пржената храна и преработените грицки. Почесто избирајте здрави масти, како оние од авокадо, јаткасти плодови и маслиново масло“, советува Гутман.
Зошто авокадото се издвојува
Авокадото особено се издвојува меѓу ваквите намирници бидејќи содржи незаситени масти, но и растителни влакна, витамини и минерали. Поради тоа добро се вклопува во начините на исхрана кои се поврзуваат со здравјето на срцето, како медитеранската и „DASH“ исхраната (начин на исхрана осмислен првенствено за намалување на крвниот притисок. Се темели на овошје, зеленчук, интегрални житарки, немасни протеини и млечни производи со помалку масти, заб. авт.).
Од „British Heart Foundation“ наведуваат дека авокадото, благодарение на својата кремаста текстура, може да помогне и како замена за намирниците со поголемо количество заситени масти.
„Поради кремастата текстура и чувството на ситост, може да биде добра замена за храна богата со понездрави масти, како сирењето, путерот и масното месо“, порачуваат од фондацијата.
Авокадото може да се јаде на тост, да се додаде во сендвичи или да се користи како додаток во јадења како „fajitas“ и „burritos“.
Што всушност значат „LDL“ и „HDL“
Гутман потсетува и дека холестеролот е масна супстанција која му е потребна на организмот за нормално функционирање.
„Холестеролот е масна супстанција во крвта која е потребна за создавање клетки и производство на одредени хормони“, објаснува тој.
Најчесто се зборува за два главни вида липопротеини кои го пренесуваат холестеролот низ крвта – „LDL“ и „HDL“.
„’LDL‘ често се нарекува ’лош‘ холестерол. Ако го има премногу, може да придонесе за создавање наслаги во артериите и на тој начин да го зголеми ризикот од срцеви заболувања“, вели Гутман.
„’HDL‘, од друга страна, често се нарекува ’добар‘ холестерол бидејќи помага вишокот холестерол од крвта да се пренесе до црниот дроб, каде што понатаму се обработува“, додава тој.
