За време на силното невреме што го погоди Скопје, дел од кровната конструкција на пливачкиот базен попушти токму во момент кога во објектот имало пливачи. Според информациите со кои располагаат медиумите, никој не е повреден, но материјалната штета е значителна, а базенот е затворен до понатамошно известување.

Фотографиите што се појавија покажуваат оштетен кров и делови од конструкцијата кои завршиле во самиот базен – сцена што кај многумина предизвика загриженост, особено ако се има предвид дека проблемите со кровот не се од вчера.

Оштетувањата се случиле додека во базенот имало пливачи

Според информации до кои дојдовме, дел од кровната конструкција попуштил токму за време на невремето, додека во базенот имало корисници.

За среќа, нема повредени, но на фотографиите што кружат на социјалните мрежи може да се забележат остатоци од кровната конструкција во базенот, како и видливо оштетување на таванот.

Корисниците веднаш биле известени дека часовите се прекинуваат, а подоцна и дека базенот ќе остане затворен до негова реконструкција.

Реконструкцијата беше најавена, но никогаш не започна

Уште минатата година, по инцидентот кога од таванот падна летва, тогашното раководство на спортскиот центар најави дека објектот има потреба од целосна реконструкција.

Тогаш беше соопштено дека санацијата извршена во 2010 година не ги решила суштинските проблеми, дека ќе се изработи проект, ќе се распише тендер и ќе следува темелна реконструкција на кровната конструкција. Во меѓувреме беше поставено заштитно платно како привремено решение.

Но, наместо реконструкција, базенот продолжи да работи со привремена санација.

Една година подоцна, силното невреме покажа дека проблемот не исчезнал.

Корисниците останаа без информации кога ќе се вратат во базенот

По инцидентот, корисниците биле известени дека сите активности се прекинуваат и дека базенот нема да биде во функција до негова реконструкција.

Од Спортскиот центар соопштија дека е причинета голема материјална штета и дека јавноста дополнително ќе биде информирана за следните чекори.

Во овој момент нема официјален рок кога базенот повторно ќе ги отвори вратите.

Тоа дополнително ги загрижува родителите, рекреативците и пливачките клубови, кои стравуваат дека реконструкцијата би можела повторно да се одолжи.

Во меѓувреме, од управата ги известија корисниците дека активните претплати ќе бидат рефундирани. Според известувањето испратено до пливачите, следната недела ќе бидат објавени деталите за начинот на враќање на средствата за неискористените термини.

Уште еден симбол на неодржуваната инфраструктура?

Случајот повторно ја отвора темата за состојбата на јавната спортска инфраструктура во Скопје.

Градот со години се соочува со објекти кои чекаат реконструкција, одложени проекти и затворени јавни капацитети. Сега постои опасност и еден од најзначајните затворени базени во државата да остане надвор од употреба подолг временски период.

Прашањето кое логично се поставува е – ако уште минатата година беше утврдено дека е потребна темелна реконструкција, зошто таа не беше реализирана навреме?

Дали ќе се реагира брзо или Скопје повторно ќе добие уште еден објект што со години ќе чека на реконструкција?

За среќа, овојпат нема човечки жртви и повредени. Но, токму тоа не смее да биде единствената добра вест. Вистинското прашање е дали институциите ќе извлечат поука од инцидентот или повторно ќе чекаме следен предупредувачки момент за да се реши проблем што одамна бил познат.