Американскиот претседател Доналд Трамп изјави дека договорот меѓу Соединетите Американски Држави и Иран, кој треба да доведе до повторно отворање на Ормутскиот Теснец, ќе биде потпишан денеска.

Сепак, иранските власти го оспорија тој временски рок, наведувајќи дека меморандумот за разбирање сè уште не е финализиран и дека потпишување денеска нема да има.

Трамп: Ова е договор без нуклеарно оружје

Во објава на социјалните мрежи, Трамп порача дека новиот договор е целосна спротивност на нуклеарниот договор склучен за време на администрацијата на Барак Обама.

„Ова е целосна спротивност – ѕид против какво било нуклеарно оружје“, напиша Трамп.

Тој додаде дека Иран повеќе нема да поседува нуклеарно оружје ниту преку развој, ниту преку купување или каков било друг начин на набавка.

Американскиот претседател истакна и дека, за разлика од претходниот договор, во новиот аранжман нема да има финансиски трансакции меѓу двете страни.

Трамп најави дека во иднина САД ќе ја преземат и таканаречената „нуклеарна прашина“, односно преостанатиот нуклеарен материјал во Иран, користејќи стратешки бомбардери Б-2.

Истовремено упати и упредување дека доколку договорот не успее, Вашингтон располага со „крајна алтернатива“, без да прецизира на што точно мисли.

Иран: Потпишување во недела нема да има

Набргу по изјавата на Трамп, од Техеран стигна демант.

Корпусот на чуварите на Исламската револуција соопшти дека меморандумот за разбирање сè уште не е завршен и дека потпишување во недела „дефинитивно нема да има“.

Според иранските власти, необичното инсистирање на Трамп договорот да биде потпишан токму на 14 јуни е поврзано со неговиот роденден.

Иранската Револуционерна гарда оцени дека американскиот претседател сака потпишувањето да го претвори во личен промотивен настан.

Портпаролот на иранското Министерство за надворешни работи исто така изјави дека договорот нема да биде потпишан во недела, но додаде дека не може да се исклучи можноста тоа да се случи во наредните денови.

Следуваат нови преговори

Според американски претставник, доколку меморандумот биде потпишан, ќе започне нов 60-дневен период на разговори за спроведување на договорената рамка и за решавање на преостанатите спорни прашања.

Извори блиски до преговорите наведуваат дека потпишувањето најверојатно ќе биде извршено по електронски пат, бидејќи организирањето директна средба меѓу двете страни претставувало логистички и безбедносен предизвик.

Сепак, и понатаму остануваат отворени повеќе клучни прашања, меѓу кои иднината на иранската нуклеарна програма, активностите на проиранските вооружени групи во регионот и пристапот до замрзнатите ирански финансиски средства.

Дополнителна неизвесност создава фактот што Вашингтон и Техеран различно ги толкуваат условите кои наводно се договорени.

Пакистан посредува во разговорите

Пакистанскиот премиер Шехбаз Шариф, кој посредува меѓу двете страни, изјави дека САД и Иран постигнале рамка за мировен договор и дека очекува потпишување во следните 24 часа.

„Поблиску сме до мировен договор од кога било досега“, изјави Шариф.

Во меѓувреме, британскиот премиер Кир Стармер разговарал со Трамп за напорите за завршување на кризата, нагласувајќи дека секој договор мора да обезбеди траен и одржлив мир.

Поддршка за посредничката улога на Пакистан изразил и катарскиот премиер во разговор со својот пакистански колега.

И покрај оптимистичните изјави од дел од посредниците, останува неизвесно кога точно ќе биде потпишан договорот и дали двете страни навистина успеале да ги надминат сите спорни прашања.