Првото заедничко патување често е пресвртница за врската – „или ќе успее или нема“. Што ако вашиот партнер сака да спие до доцна, а вие станувате рано? Што ако тој или таа сака само да лежи на плажа, додека вие сте љубител на музеи и галерии? Што ако нема разбирање за половина час тивко скролање по телефон во кревет пред вечера?

Можеби звучи претерано, но многумина мислат исто, пишува „Euronews“. Според истражување на „Booking.com“ спроведено минатата година, повеќе од две третини од британските патници би отишле на заедничко патување за да ја проценат компатибилноста со партнерот.

Секако, сакате да ѝ/му обезбедите на вашата потенцијална подобра половина најдобри можни услови за успех на врската – и токму за тоа служи новиот Индекс на успешност на патувања за парови.

Индексот е осмислен од терапевтката за партнерски и сексуални односи Џорџина Вас во соработка со модниот бренд „Pour Moi“. Листата ги зема предвид фактори како стрес од гужви, пристапност, безбедност, квалитет на сон и удобност, како и можности за поврзување и заеднички искуства, со цел да утврди кои дестинации се идеални за парови.

Секоја дестинација е оценета со резултат од 0 до 100 за секој критериум, по што е пресметан просечен резултат. Вкупен победник е италијанското езеро Лаго ди Гарда.

Зошто Лаго ди Гарда е совршено за прво патување во пар?

Иако езерото Комо е омилено меѓу познати личности и инфлуенсери, најголемото италијанско езеро се смета за поромантично токму затоа што не е толку оптоварено со гужви.

Според Џорџина Вас, Лаго ди Гарда добил максимални 100 поени за „поврзување“ благодарение на прекрасните пејзажи и можностите за релаксација, а високо е оценет и во категоријата „сон и удобност“.

Се наоѓа во северна Италија и е лесно достапен од Милано, Венеција и Верона.

Каде уште вреди да се патува?

Второто место го зазеде уште една езерска дестинација – Блед во Словенија.