Познатата Дениз Ричардс (55) отворено зборува за своето искуство со естетските операции. Во интервју за „Allure“, објавено на 20 март, актерката и ријалити ѕвезда раскажала дека пред осум месеци направила фејслифтинг, повеќе од три децении откако на 19 години првпат отишла „под нож“ поради вградување силикони во градите.
„Сакав работите да ги вратам таму каде што беа порано“, рекла таа за фејслифтингот, додавајќи дека, иако веќе имала естетски операции, самата помисла на операција на лицето била „застрашувачка“.
„Да се биде во јавноста уште од дваесеттите години значи дека луѓето знаат како изгледам, а фејслифтингот не е нешто што можам да го скријам“, изјавила таа.
Ѕвездата на ријалити шоуто „The Real Housewives of Beverly Hills“ раскажала дека првпат се сретнала со докторот Бен Талеи од Беверли Хилс за да го започне процесот на фејслифтинг, откако слушнала за него преку лекарот што ѝ правел ревизија на имплантите во градите, откако двата импланти ѝ пукнале за време на учеството во емисијата „Special Forces: World’s Toughest Test“.
Ричардс истакнала дека имала целосна доверба во Талеи и дека била презадоволна од резултатите по фејслифтингот, кој вклучувал подигнување на веѓите во пределот на слепоочниците, операција на очните капаци, подигнување на надворешните агли на усните и вбризгување сопствена маст.
„Моето лице беше во негови раце“, нагласила таа, присетувајќи се како некои нејзини познати пријатели ја советувале дека, ако веќе оди на операција, да направи сè, наместо да прескокне одредени зафати како очите, за што размислувала.
„Реков: ’Ти си уметник. Прави што и да сакаш‘. Разликата е како ноќ и ден. Всушност е шокантно“, рекла Ричардс.
Актерката исто така зборувала и за деталите од своите естетски зафати кои доспеале во јавноста за време на разводот од поранешниот сопруг, Арон Фајперс, пишува „Пипл“.
„За време на разводот, мојот поранешен откри дека сум направила фејслифтинг. Испрати фотограф пред ординацијата каде што правев микронидлинг на лузните. Потоа му кажал некому дека сум направила фејслифтинг и дека бил лошо изведен, што навистина е смешно“, рекла актерката.
„Знаете, размислував дали воопшто да зборувам за фејслифтингот, но тој веќе откри сè. Мислам дека можев да се извлечам со приказната ’изгледа многу подобро по разводот‘. Веројатно ќе успеев, а можеби и не, не знам“, додала Дениз.
