Митот за платите на брод

Луси, која на „YouTube“ го води каналот „Cruising As Crew“, во видеото со наслов „Кој навистина заработува најмногу на крузерите: Платите на екипажот откриени“ детално објасни како функционираат примањата на бродот.

„Објаснувам како платата на крузер навистина функционира, зошто платата не секогаш значи и најголема заработка и кои позиции на бродот тивко носат многу повеќе пари отколку што луѓето очекуваат“, наведе таа.

„Луѓето разбирливо мислат дека чин значи и пари. Капетанот е богат, офицерите заработуваат многу, а пониско рангираниот персонал едвај врзува крај со крај? Мислам дека тој мит доаѓа од логиката на животот на копно“, објасни Луси.

Униформите и титулите можат да измамат

Луси додава дека платите можат драстично да се разликуваат од компанија до компанија, но дека едно правило речиси секаде е исто. На таквиот впечаток влијаат и униформите.

„Кога гледате луѓе кои работат во малопродажба или услужни дејности, парите не се првата асоцијација. Од друга страна, ако се земе предвид дека капетанот, доколку нешто му се случи на бродот, мора да остане на него додека сите не се симнат и потенцијално да го ризикува сопствениот живот, би помислиле дека токму тој заработува најмногу“, вели таа.

Таа додава дека „беспрекорните униформи“ и „елегантните титули“ на водечките луѓе на бродот дополнително го засилуваат впечатокот дека тие се најплатени.

Тајната е во провизијата

Реалноста, сепак, е поинаква. Најголемите пари, вели Луси, ги заработуваат продавачите кои работат на провизија, а кои на патниците често им се речиси невидливи.

„На крузерите платата не го одразува вистинскиот потенцијал за заработка. Некој без формални квалификации во малопродажба или продажба може да заработи повеќе од некој со децении искуство, бидејќи патниците не ги гледаат структурите на провизии, праговите за бонуси, продажните натпревари, осцилациите во заработката зависно од рутата на патувањето и колку гостите импулсивно трошат додека се на одмор“, откри таа.

Фиксна плата наспроти променливи приходи

На крузер постојат две главни групи работни места. Во првата спаѓаат капетанот, инженерите, медицинскиот персонал и тимот на командниот мост. Сите тие имаат фиксна плата.

„Нивната плата е стабилна, предвидлива и ограничена. Платени се без разлика дали бродот е полн или празен и дали патниците трошат пари или не. Без разлика дали е ден на море или во пристаниште, платата им е иста“, објаснува Луси.

Во втората група се работниците кои заработуваат преку провизија, како продавачите на накит и луксузни чанти или домаќините во казиното.

„Нивните приходи можат значително да варираат бидејќи зависат од потрошувачката на патниците. На полн брод, со добра рута и вистинска клиентела, вработените на тие позиции можат да заработат значително повеќе од офицерите“, вели таа и заклучува:

„Не продавате само производи, продавате емоции … луѓето на одмор трошат повеќе пари.“