Во главата на Хејли Рабери купувањето на камп-приколката значело предизвик и карта за бесплатни семејни патувања.

Дотраената приколка ја купила речиси импулсивно. Денес, благодарение на сопствените раце, имагинацијата и бројните евтини трикови од светот на „направи сам“, нејзиното семејство ужива во одмори без трошоци за сместување.

Кога таа и нејзиниот партнер првпат влегле во приколката, глетката не била особено гламурозна. Ентериерот бил типичен за доцните осумдесетти: излижани тапацирани седишта со шари какви што денес ретко се гледаат, тешки ормарчиња и општ впечаток на простор кој видел многу подобри денови.

„Ѝ беа потребни малку љубов и внимание, но веднаш го видовме потенцијалот“, им објаснила Хејли на своите следбеници.

Првиот чекор бил радикален

На почетокот, речиси целосно ја оголиле внатрешноста. Стариот мебел и дотраените материјали морале да излезат за да направат место за свеж изглед. Наместо скапи парчиња, Хејли тргнала по патот кој денес е сè попопуларен меѓу љубителите на DIY проекти: потрага по поволни и половни работи.

Мебелот го наоѓале на „Facebook Marketplace“, во second hand продавници и хуманитарни продавници. Секое парче внимателно го избирале и го приспособувале на просторот, додека надворешниот дел од приколката темелно го исчистиле и ја отстраниле нечистотијата што се собирала со години.

„Од пренаменет мебел до половни ситници, ја развлековме секоја фунта колку што можевме. Неверојатно е што сè можете да направите кога ќе ѝ дадете слобода на фантазијата“, рекла таа.

И надворешноста доживеала трансформација

Надворешниот изглед на приколката исто така доживеал целосна трансформација. Парот ја префарбал со спреј за да добие сосема нов идентитет, а околу надворешниот дел додале елегантна лента во темнозелена, речиси шумска нијанса.

Внатрешноста дополнително ја разубавиле со модерни дрвени облоги кои на просторот му даваат топлина и карактер.

Посебно внимание посветила на кујната

Наместо типичниот изглед на кампер, Хејли се одлучила за рустичен „cottage“ стил. Малиот простор така добил шармантни мрежести завеси и голем керамички мијалник, каков што почесто се гледа во класични кујни отколку во камп-приколки.

Спалниот дел од приколката е уреден во топли, земјени тонови, а Хејли околу „спалната соба“ поставила низа светилки кои создаваат пријатна, речиси бајковита атмосфера.

Приколката, на која ѝ го дале името Џојс, не служи само за патувања. Кога не е на пат, семејството ја користи како своевидно мало засолниште во дворот. Таму организираат филмски вечери, поминуваат мирни моменти или едноставно уживаат во просторот кој е одвоен од главната куќа.

Како некоја поскапа градинарска куќичка

Хејли целата трансформација ја споделила со своите речиси 150.000 следбеници на Инстаграм, а проектот ја воодушевил нејзината онлајн публика.

„Направи внатрешноста да изгледа прекрасно“, напишала една следбеничка.

„Ова ми е апсолутно фантастично. Кога барем би имала каде да ја ставам приколката! Како некоја поскапа градинарска куќичка – совршено“, додала друга.

Трета заклучила: „Еден ден ова дефинитивно морам да го направам!“.