Причината за смртта на Викторија Џонс беше објавена во вторникот, шест недели откако беше пронајдена мртва во хотелска соба во Сан Франциско.
Ќерката на актерот Томи Ли Џонс починала поради „токсични ефекти од кокаин“, потврди канцеларијата на главниот медицински истражител за „Fox News“. Начинот на нејзината смрт е прогласен за „несреќа“.
Викторија беше пронајдена мртва во хотелот „Fairmont San Francisco“ на први јануари. Аудиоснимката од повикот до службата за итна помош укажува на тоа дека веројатно се предозирала со дрога.
Противпожарната служба на Сан Франциско потврди дека екипите одговориле на повик што пристигнал од хотелот околу 2:52 часот наутро на први јануари во врска со медицинска итна состојба.
Повикот за инцидентот бил класифициран како „шифра 3 за предозирање, промена на боја“, според аудиоснимката од итната помош што ја добил магазинот „People“.
Актерот Томи Ли Џонс и неговото семејство претходно се огласија по повод смртта на Викторија.
„Ги цениме сите убави зборови, мисли и молитви. Ве молиме почитувајте ја нашата приватност во текот на овој тежок период. Ви благодариме“, напишаа тие.
Да потсетиме, Викторија беше ќерка на Томи Ли Џонс и неговата поранешна сопруга Кимберли Клафли.
Оствари неколку помали актерски улоги, вклучувајќи појавувања во филмовите „Men in Black“ од 2002 година и „The Three Burials of Melquiades Estrada“ од 2005 година, а глумеше и во една епизода од серијата „One Tree Hill“. Според нејзиниот профил на IMDb, последната филмска улога ѝ беше во филмот „The Horseman“ од 2014 година, кој го режираше нејзиниот татко.
