Благодарение на социјалните мрежи, сѐ повеќе луѓе ја откриваат убавината на реката Шала во Албанија, која веќе ја нарекуваат „Тајландот на Европа“. Ова место на нашиот континент е идеално и за есенски одмор, бидејќи температурите често надминуваат 25 степени!

Тиркизна вода, длабоки клисури, бујно зеленило... да, тоа е Европа

Реката Шала извира во близина на селото Тет, на северот од Албанија, а се влева во езерото Коман – вештачко езеро создадено на реката Дрин. Таа тече низ длабоки клисури и кањони, а поради нејзините исклучително чисти и тиркизни води често ја споредуваат со егзотичните острови во југоисточна Азија. Иако е планинска река, нејзините нијанси на сина и зелена изгледаат како да припаѓаат на тропско море, пишува „putnikofer.hr“.

До реката може да се стигне само со чамец

Со својата тиркизна боја, драматични карпи и бујно зеленило, реката Шала навистина е едно од најубавите и најнеобичните места на Балканот. Британскиот медиум „Express“ пишува дека фотографиите од нејзините брегови лесно можат да измамат – многумина кои ги гледаат на социјалните мрежи мислат дека се снимени некаде на Тајланд, а не во срцето на Европа. Посебна доза мистичност додава фактот што до неа не може да се стигне со автомобил – пристапот е можен само со чамец.

Авантурите најчесто започнуваат во градот Скадар, од каде се патува до пристаништето Коман. Потоа следи пловење со чамец низ импресивните кањони на езерото, сѐ додека пред очите не се појави бајковитата глетка на реката Шала.

Најдобро време за посета е од мај до септември

Патувањето со чамец трае околу час и половина, а самото пловење, според оние што го искусиле, спаѓа меѓу најубавите во Европа. Високите карпи, тиркизната вода и апсолутниот мир создаваат впечаток дека сте залутале во некој далечен, недопрен свет.

Најповолниот период за посета е од мај до септември, кога температурите се пријатни, а чамците редовно пловат. Иако водата е ладна дури и во лето, многумина не можат да одолеат на капење во неверојатно чистата река. По нејзините брегови има мали дрвени куќички, кампови и неколку гостилници кои нудат домашна храна и глетка што ретко се гледа.

Иако станува сѐ попопуларна, гужвите сѐ уште не ја промениле

Посетителите овде можат да пливаат, да возат кајак, да пешачат по околните патеки или едноставно да уживаат во тишината и природната убавина. Авантуристите често се одлучуваат за зип-лајн преку реката, додека оние што бараат одмор можат едноставно да го поминат денот покрај водата, далеку од бучавата и метежот.

Иако последниве години, благодарение на социјалните мрежи, станува сѐ попопуларна, реката Шала остана недопрена и чиста. Тоа е место каде што природата сѐ уште го има главниот збор.