Путин истакна дека за време на вежбите на стратешките офанзивни сили биле тестирани ветувачки модели на оружје, нагласувајќи дека Русија е светски лидер во нуклеарното одвраќање.

„Уште еднаш ја потврдивме сигурноста на нуклеарниот штит, стратешките сили се способни целосно да ја обезбедат националната безбедност на Руската Федерација и Федералната држава“, рече Путин.

Герасимов прецизираше дека тестирањето на новата ракета Буреве́стник е извршено на 21 октомври. Ракетата поминала 14 илјади километри за 15 часа, што, како што изјави, не е нејзиниот краен дострел.

„За време на летот, ракетата ги извршила сите потребни вертикални и хоризонтални маневри, демонстрирајќи ги своите високи способности за заобиколување на ракетните и воздушните одбранбени системи“, рече Герасимов.

Путин рече дека клучните цели на тестот се постигнати и најави понатамошни чекори. Тој нагласи дека крстосувачките ракети со нуклеарен погон се уникатно оружје што никој друг во светот не го поседува.

„Неопходно е да се дефинираат можните методи на примена и да се започне со подготовка на инфраструктурата за распоредување на ова оружје во нашите вооружени сили“, додаде тој.

Ситуација на бојното поле

Зборувајќи за ситуацијата во зоната на „специјална воена операција“, како што Русите ја нарекуваат војната што ја започнаа, Герасимов извести дека групата „Центар“ го завршила опколувањето на украинските сили во областите Красноармејск и Димитров, каде што, рече тој, биле опкружени до пет и пол илјади војници.

„Во меѓувреме, борците од групата Запад го зазедоа преминот преку реката Оскол и го опколија Купјанск, каде што се наоѓаат околу пет илјади украински војници. Волчанск е ослободен за 70%, а борбите за Јампол исто така завршуваат“, рече Герасимов.

„Руската армија историски секогаш се однесувала со милост кон поразениот непријател. И ние ќе продолжиме така“, порача Путин.