Денес се навршуваат точно шест месеци од најцрната ноќ во поновата историја на Кочани – и на цела Македонија.
Пожарот во дискотеката „Пулс“, кој одзеде 62 животи, сè уште одекнува во колективната меморија како болно потсетување на човечката и институционалната ранливост.
На овој ден, многумина повторно се свртеа кон тишината. Нема големи говори, ниту свечени настани. Само фотографии, сеќавања и болка што не избледува.
Ана Костадиновска, една од преживеаните, сподели неколку емотивни фотографии – со краток опис „си беше еднаш...“. Болката понекогаш зборува сама, тивко, но силно.
Шест месеци по трагедијата, останува прашањето: што научивме?
Македонија изгуби генерација – млади, талентирани, полни со живот. Изгуби синови и ќерки, пријатели и соништа. Изгуби дел од себе.
Истовремено, заедницата во Кочани покажува како болката може да се претвори во сила – преку хуманост, поддршка и постојана потрага по одговорност. Но одговорите сè уште ги нема.
Шест месеци подоцна, болката е иста. Само календарот се менува, а нешто што останува се спомените.
Автор: Ц.Н.
