Митот за 10.000 чекори дневно е разбиен: Науката вели дека и помалку носи големи придобивки

Научниците откриле дека досега прифатената цел не е нужно златен стандард, бидејќи вкупната смртност се намалила за речиси половина кај лицата што оделе 7.000 чекори во споредба со оние што направиле само 2.000 чекори дневно, пишува „Financial Times“.

Бројката од 10.000 ја осмислила јапонската компанија „Yamasa“ за да ги промовира педометрите за време на Олимписките игри во Токио во 1964 година. Оваа бројка стана популарна цел во физичката активност како што паметните телефони со бројачи на чекори стануваа сè пошироко распространети.

„Брендот на педометри дефинитивно беше добро маркетиншки позициониран“, рекла Динг Динг, главната авторка на студијата објавена во списанието „The Lancet Public Health“ во среда. „Мислам дека тоа има големи придобивки за јавното здравје – 10.000 е убава заокружена бројка, па е погодна за поставување цели – иако не е заснована на докази.“

Истражувачите анализирале податоци од над 160.000 возрасни лица за да го проучат како ризиците од сериозни здравствени проблеми се разликуваат во зависност од бројот на дневно направени чекори. Студијата, која се потпира на десетици претходни истражувања, претставува пресвртница во проучувањето на влијанието на целите за движење, вклучувајќи ја и познатата цел од 10.000 чекори, врз широк спектар на здравствени состојби.

Вкупната смртност кај лицата што оделе 7.000 чекори била 47 проценти помала од онаа кај оние што оделе само 2.000 чекори. Ризиците за оние што правеле 7.000 чекори се намалиле во однос на здравствените проблеми, вклучувајќи смрт од кардиоваскуларни болести и рак, како и појава на дијабетес тип 2 и деменција.

Придобивките од уште поголем број чекори биле помалку изразени, при што стапката на смртност била 48 проценти помала за оние што направиле 10.000 чекори во споредба со оние со 2.000 чекори. Динг истакнала дека 10.000 чекори сè уште се поврзани со подобри исходи од 7.000 за некои здравствени состојби, како дополнително намалување на ризикот од симптоми на депресија за 14 проценти.

„Јасно е дека не им препорачувам на луѓето што моментално одат 10.000 чекори дневно да се вратат на 7.000“, рекла Динг, професорка по јавно здравје на Универзитетот во Сиднеј. „Меѓутоа, по околу 7.000 чекори, дополнителната здравствена придобивка за секои наредни 1.000 чекори почнува да се намалува, па има помал ’поврат на инвестицијата‘.“

„Студијата е важен придонес во научната литература кој помага да се разбие митот дека целта од 10.000 чекори дневно треба да биде стандард за оптимално здравје“, рекол Даниел Бејли, вонреден професор на Универзитетот „Brunel“ во Лондон.

„За постигнување на најдобро намалување на ризикот може да се препорача цел од 5.000 до 7.000 чекори дневно, што ќе биде поостварливо за многу луѓе од неофицијалната цел од 10.000 чекори што постои со години“, додал Бејли.

Еден од резултатите на оваа студија бил дека придобивките од движењето над 10.000 чекори се значајни: при 12.000 чекори, вкупната смртност била 55 проценти помала отколку кај 2.000 чекори. Ова сугерира дека „Yamasa“, пионер во промоцијата на фитнес носива технологија, сепак бил на вистинскиот пат со поттикнувањето на високо поставени цели.

Студијата покажува дека не треба да се глорифицира специфична цел, рекол Ендру Скот, предавач по клиничка физиологија на вежбање на Универзитетот „Portsmouth“. „Таа покажува дека, генерално, повеќе движење е секогаш подобро и дека луѓето не треба премногу да се фокусираат на самите бројки, особено во денови кога движењето е ограничено. Тоа едноставно значи дека 10.000 чекори дневно не се единствената бројка на која треба да се цели.“