Советот е всушност многу едноставен: „движете се по оброкот“.

„Најлесниот начин да го направите тоа е да излезете на прошетка – и тоа брза“, објаснува д-р Елрој Агијар, вонреден професор по наука за вежбање на Универзитетот во Алабама и експерт за физичка активност, пренесува „independent.co.uk“.

Една студија објавена во списанието "International Journal of General Medicine" укажува дека прошетката веднаш по јадење е поефикасна за слабеење отколку прошетка со иста должина во подоцнежниот дел од денот. Причината може да биде во тоа што телото полесно го регулира нивото на шеќер во крвта веднаш по оброкот.

Зошто е корисно да шетате по јадење?

„Знаеме дека дури и кратка физичка активност има веднаш ефект“, вели д-р Агијар. „Одма се намалува крвниот притисок и нивото на шеќер во крвта.“

Тој се повикува на уште една студија за постпрандијална прошетка, која испитувала дали е подобро да се вежба 15 минути веднаш по секој главен оброк, три пати дневно, или истото времетраење да се искористи наутро или навечер. Биле формирани три групи учесници.

Студијата се фокусирала на постари лица со ризик од нарушена гликозна толеранција, и покажала дека тие кои шетале веднаш по јадење имале најмали осцилации на шеќерот во крвта во текот на денот.

За време на физичката активност, гликозата се повлекува во клетките на активните мускули, каде се користи како извор на енергија. Како резултат на тоа, нивото на шеќер во крвта опаѓа, што помага да се задржи стабилна енергија и се намалува оптоварувањето на панкреасот.

„Идејата е да извршите 15 минути физичка активност по оброк, со што го спречувате наглиот скок на шеќерот во крвта и го држите во постабилен опсег – до 24, па дури и 48 часа“, објаснува Агијар.

„Тоа е како да земате мали залчиња од вежбањето. Не мора да трчате еден час и да се испотите до исцрпеност. Доволно е да прошетате 15 минути по секој главен оброк – и тоа веќе има голем здравствен ефект.“

Кој може да има корист од шетањето по оброк?

Овој совет е особено важен за лица со инсулинска резистенција, предијабетес или зголемен крвен притисок. Но, д-р Агијар нагласува дека шетањето по оброк не е резервирано само за тие групи – секој може да има корист.

„Ова им помага на сите, затоа што ја намалува количината работа што треба да ја изврши панкреасот за да го регулира шеќерот во крвта“, објаснува тој.

„Дијабетесот и метаболичкиот синдром – комбинација од пет фактори на ризик за срцеви заболувања: зголемен обем на половината, високи триглицериди, низок ’добар‘ холестерол (HDL), висок крвен притисок и висок шеќер во крвта – ги нарекуваме тивки убијци, бидејќи нивните ефекти се акумулираат со години.“

„По секоја вежба веднаш доаѓа до намалување на притисокот и шеќерот“, вели Агијар. „И токму тој ефект, ако се повторува со години и децении, може да ве заштити од метаболички синдром, дијабетес и хипертензија. Тоа не настанува преку ноќ, но редовната физичка активност спречува тие состојби да станат сериозни.“

Како најдобро да ги искористите прошетките по јадење?

Ако идејата за постоброкна прошетка ви звучи примамливо, д-р Агијар има неколку практични совети за максимална корист. Прво, препорачува брзо темпо – околу 130 чекори во минута, што е побрзо од обична прошетка.

„Целта е да одите со темпо при кое ќе останете малку без здив, можеби и малку ќе се испотите. Добар тест е да можете да зборувате, но не и да пеете. Тоа е умерен интензитет.“

Овој совет се совпаѓа со препораките на Светската здравствена организација и британскиот Национален здравствен систем: најмалку 150 минути физичка активност со умерен интензитет неделно.

„Редовното вежбање, секој ден или барем секој втор, со умерен интензитет, ќе го подобри крвниот притисок и нивото на шеќер во крвта“, додава тој.

„Со време, ќе се зголеми добриот (HDL) холестерол, ќе се намали лошиот (LDL), ќе дојде до губење телесна маса и намалување на обемот на половината. Со тоа покривате сите пет фактори на ризик за метаболички синдром.“

Д-р Агијар нагласува: „Сите тие фактори може да се таргетираат преку вежбање – и на краток и на долг рок – што значи дека правите разлика не само сега, туку и за иднината.“

Со други зборови, ако сакате да направите нешто конкретно за вашето долгорочно здравје, прошетка од 15 минути по оброкот е одлично место за почеток.