Токму таа слика ни се појавува во мислите кога ќе помислиме на Грција. Ова е земја каде што се јаде извонредно добро, а токму гастрономската понуда, базирана на медитеранските принципи на исхрана, е една од главните причини зошто многумина ја посетуваат. Грција ја има една од најдобрите кујни во светот, а ова се традиционалните грчки јадења што задолжително треба да ги пробате.

Маслиново масло – крал на грчката кујна

Медитеранската кујна е синоним за здрава исхрана, а грчката е токму тоа. Зеленчук, овошје, житарки и мешунки се главни ѕвезди уште од дамнешни времиња, кога месото се јадело само за празници и посебни прилики, а не секојдневно, како денес. Во тој растителен пристап, маслиновото масло е вистински крал. Силен придонес имаат и зачините оригано, рузмарин и мајчина душица, но клучната идеја и тајната на успехот отсекогаш биле исто: едноставност и квалитетни состојки.

Изобилство од месо

Традиционално, месото било резервирано за свечени моменти, но денес е многу присутно во грчката гастрономија. Исто така и рибата и морските плодови, при што особено често ќе наидете на јадења со октопод. Сирењето е секогаш тука – низ цела Грција постојат најразлични видови сирења, но едно е задолжително: фета. Како и петте јадења што мора да ги пробате кога ќе бидете во Грција.

Храната се споделува со другите

Не е само важно што се јаде, туку и како. Еден од омилените начини на уживање во храна во Грција е споделувањето – маса покриена со разновидни јадења што се делат. И тоа доцна навечер. Вообичаено време за вечера во грчките ресторани е околу 21 часот, а околу 19 часот тие најчесто сè уште се празни.

Вкусна „утешна“ храна

Мусака е едно од оние јадења што, ако не сте го пробале како да и не сте биле во Грција. Таа е направена од слоеви модар патлиџан, мелено месо (обично говедско или јагнешко), компири, сето прелено со кремаст бешамел сос. Вистинска утешна храна, богата, но и симбол на летото поради модриот патлиџан – главната состојка. Подготовката бара труд, но ретко ќе најдете грчка таверна што не нуди мусака.

Месно јадење што се сервира со сос

Сувлаки, грчките ражничиња, е уште едно јадење што неизбежно асоцира на Грција. Обично се подготвува од свинско или пилешко месо, а тајната на вкусот е во маринадата од маслиново масло, сок од лимон и зачини. Се сервира со прочуениот грчки сос ѕаѕики и пита леб, кој при печење се надувува. Археолошки наоѓалишта покажуваат дека сувлаки е многу старо јадење – се јадело уште пред 4000 години.

Долма – совршена и како предјадење и главно јадење

Долма е уште еден грчки фаворит на кој сигурно ќе наидете кога ќе појдете во некој грчки ресторан. Одлична е и како предјадење и како главно јадење. Се работи за завиткување на мешавина од ориз, мелено месо и зачини во листови од лозјето. Дополнителен вкус добива со маслиново масло и лимон. Долма е јадење што лесно може да се направи и во вегетаријанска верзија, па така е одличен избор и за оние што не јадат месо. Секоја грчка област има свој рецепт за „најдобрата долма“.

Пита со фета и спанаќ

Спанакопита е уште едно омилено грчко јадење, кое покрај во рестораните, се среќава и во секоја грчка пекара. Се прави со спанаќ, фета сирење и тенко, безквасно тесто. Неизбежни се и кромидот и лукот. Може да биде и брз оброк, и предјадење, и прилог во рамките на поголем оброк.

Освежителен сос со јогурт и нане

И за крај – ѕаѕики, освежителниот сос без кој не може да се замисли грчката трпеза. Се прави од грчки јогурт, краставица, маслиново масло, сок од лимон и многу лук. Зачините што најчесто се користат се нане или копар. Одличен е и како намаз во сендвичи, и како додаток на скара – без разлика дали е месо или зеленчук.