На 11 мај со почеток во 09.00 часот ќе се одржи традиционалната улична трка HalkEco Скопје Трча 10КМ, а заинтересираните имаат уште нешто повеќе од една недела да се пријават за учество во трката.
Пријавувањето може да се направи преку официјалната веб страница, а секој љубител на трчањето ќе има шанса сè до 30.04.2025 (во 23:59 часот) или до пополнување на предвидениот број учесници, да се пријави преку сајтот на HalkEco Скопје Трча 10КМ, односно на следниот линк https://www.skopje.run/page5.html. На денот на трката не е можно пријавување.
При процесот на пријавување учесникот ќе треба да го одбере таргет времето за кое би ја истрчал трката, и според кое ќе биде распореден во стартната зона. На стартот на трката тркачите ќе бидат распоредени во 5 стартни боксови според таргет времето кое го имаат одбрано при процесот на пријавување. Таргет времињата се следни: зона 1 - таргет време под 45:00, зона 2 - таргет време од 45:01 до 50:00, зона 3 - таргет време од 50:01 до 55:00, зона 4 - таргет време од 55:01 до 1:00:00 и зона 5 - таргет време над 1:00:01.
Стартот, како и целта на трката ќе бидат позиционирани на веќе препознатливата локација, - пред фонтаната Лотус во Скопје, а патеката за трчање ќе биде поставена по дел од булеварот Илинден и дел од булеварот Партизански Одреди. Времетраењето на трката ќе биде 90 минути, по тој период сите учесници ќе бидат замолени да ја напуштат патеката. Должина на патеката е 10.000 метри, која се трча во еден круг со старт и цел на исто место.
Трката е отворена за сите, без разлика дали се работи за индивидуални учесници, или пак за група пријатели или компанија, кои имаат можност да ја пријават својата екипа за рангирање на екипен пласман на трката.
Организаторот на трката Сојуз на спортови на Скопје (кој е организатор на Виз Ер Скопски Маратон и Авицена Женска Трка), во соработка со А.К. Скопски Маратон, А.К.Работнички и со помош на Министерството за внатрешни работи ги повикуваат сите љубители на спортот и трчањето, да се пријават и да земат учество на овој спортски настан.
Насловен спонзор на HalkEco Скопје Трча 10КМ e Халк Банка, а покровители се Министерството за спорт и Град Скопје, со огромна помош и поддршка од верните спонзори и партнери.
Успешната приказна СКОПЈЕ ТРЧА започна 2017 год, која беше организирана со ентузијазам и желба да се збогати понудата на квалитетни трки, при што заедно со спортистите целта е да се подигне свеста за активен живот на граѓаните. Оваа трка годинава ќе го има своето седмо издание, со што СКОПЈЕ ТРЧА веќе станува традиционална трка, со тенденција да биде организирано поуспешно издание од претходното.