Принцот Хари утрово се појави во Високиот суд на долгоочекуваното правно сослушување. Пред да влезе во судот, се сврте кон фотографите и подигна два прста во знак на поздрав.
Принцот Хари се жалеше на одлуката на Високиот суд со која беше одбиено неговото барање да биде придружуван од вооружени телохранители кога ќе се наоѓа во Велика Британија со своето семејство. Во 2024 година, судијата на Високиот суд ја отфрли тужбата на Хари против Министерството за внатрешни работи во врска со безбедносните аранжмани за него и неговото семејство за време на нивните посети во Обединетото Кралство.
Адвокатите на принцот Хари изјавија дека најмладиот син на кралот Чарлс бил „изоставен“ и третманот бил „неповолен“ кога Високиот суд во 2020 година пресудил дека тој и неговото семејство немаат потреба од заштита. Жалбената постапка ќе трае два дена, започнувајќи од денес.
Како што тврди принцот Хари, неговото семејство е под закана секој пат кога ќе одлучи да ја посети својата татковина и се плаши, како што вели, од „расизам и екстремизам“. Како пример, тој спомена инцидент од 2021 година кога беше на хуманитарен настан во Kew Gardens и едвај успеа да ги избегне новинарите кои го бркаа до неговиот автомобил.
Минатата година беше откриено дека неговата правна битка против одлуката на Министерството за внатрешни работи ја чинела британската влада повеќе од 600.000 фунти.
Додека многумина сметаа дека можеби конечно ќе се помират, кралот Чарлс замина во државна посета на Италија денес, само неколку часа пред принцот Хари да слета во Обединетото Кралство. Да потсетиме дека односите меѓу кралот и неговиот најмлад син се затегнати откако принцот Хари и неговата сопруга Меган Маркл решија да го напуштат кралскиот живот и да започнат нов во Америка, а исто така започнаа и нивните правни битки.
Принцот Хари и Меган Маркл приватно го финансираат своето обезбедување, што принцот го смета за „неразумно“. Исто така, како што е наведено, од принцот Хари се бара да ги извести 28 дена однапред ако планира да ја посети Велика Британија. Поради овие потреси, принцот Хари одбил да преноќи во Бакингемската палата во мај минатата година, бидејќи, како што изјави тогаш, не се чувствувал безбедно.
