Масовна гробница од првиот век од Римското Царство е откриена при реновирање на фудбалски терен во виенската населба Зимеринг, а ова значајно откритие денес беше претставено во археолошкиот музеј во Виена.
Гробницата беше пронајдена во октомври минатата година, кога градежните работници наидоа на остатоци од човечки скелети кои, најверојатно, припаѓале на римски војници и нивните противници – припадници на германските племиња, пренесе "AP".
По детални археолошки анализи, истражувачите презентираа докази за првата позната битка во овој регион. Експертите потврдија дека се пронајдени останки од 129 луѓе, но бидејќи се откриени многу поединечни коски, археолозите сметаат дека вкупниот број жртви надминал 150. Според нив, овој вид откритие никогаш досега не е забележан во Централна Европа.
Прв доказ за битка од римскиот период во регионот
„Кога станува збор за битките од античкиот Рим, досега во оваа област не биле пронајдени остатоци од скелети.
Во Германија се откриени огромни боишта со многу оружје, но никогаш човечки останки“, изјави археологот и водечкиот истражувач Михаела Биндер. Таа објасни дека римските војници обично биле кремирани сè до третиот век.
Гробницата, во која телата биле едноставно фрлени, укажува дека погребувањето било изведено набрзина и без организација.
Според археолозите, сите скелети покажуваат траги од сериозни повреди, особено на главата, торзото и карлицата.
„Сите жртви имаат различни бојни повреди, што исклучува можноста да биле егзекутирани“, изјави археологот Кристина Адлер-Волф.
Сите тела припаѓаат на мажи, главно на возраст меѓу 20 и 30 години.
Анализата со радиојаглерод (C-14) покажа дека останките датираат од периодот меѓу 80 и 130 година од новата ера.
Оружје и оклопи во гробницата
Во гробницата биле пронајдени оклопи, шлемови и бодежи, а испитувањата на останките продолжуваат.
Научниците се надеваат дека понатамошните анализи ќе помогнат во идентификацијата на жртвите.
„Засега најверојатната теорија е дека оваа битка била поврзана со освојувањата на императорот Домицијан во областа околу Дунав“, изјави Адлер-Волф.
Археолозите истакнаа дека оваа масовна гробница го дава првиот јасен доказ за постоење на населба, која подоцна ќе прерасне во денешната австриска престолнина – Виена.
