Во текот на арктичката зима, под влијание на ниски температури, морската вода се замрзнува и максималниот арктички морски мраз за годината е постигнат во март.
Сепак, овој годишен максимум е, по оваа зима, најнизок измерен досега, покажуваат податоците на американскиот национален центар за снег и мраз (НСИДЦ).
Минатата недела морскиот мраз на Арктикот зафати површина од 14,3 милиони квадратни километри. Ова е за 1,3 милиони квадратни километри помалку од просечниот врв во периодот од 1981 до 2010 година. Со други зборови, за да се достигне просекот, на Арктикот „недостига“ површина со морски мраз поголема од Германија, Франција и Италија заедно.
Претходниот рекорден максимум на низок морски мраз беше забележан во 2017 година, а беше за 800 илјади квадратни километри поголем од годинешниот, пренесува „Еуроњуз“.
Во светлината на климатските промени, помалку нов мраз се формира на Арктикот и помалку повеќегодишен мраз се акумулира. Важно е да се нагласи дека морскиот мраз не вклучува мраз на копно како што се ледените плочи и глечерите. Всушност станува збор за замрзната морска вода која лебди на површината на океанот.
Морскиот мраз покрива 7 отсто од вкупната површина на нашата планета или 12 отсто од светските океани.
Додека арктичкиот морски мраз го достигнува својот годишен максимум во зима, спротивното се случува во лето: поради сезонското топење на мразот поради повисоките летни температури, тој паѓа на годишен минимум. Меѓутоа, низ годините обележани со растечкото глобално затоплување, дури и овој годишен минимум станува сè помал.
И покрај фактот што во 2025 година, мартовскиот годишен максимум беше најнизок досега, тоа не значи дека и летниот минимум во септември ќе биде рекордно ниско ниво, објаснила д-р Џулиен Штров од НСИДЦ.
Но, според неа, „вкупниот долгорочен пад на ледената покривка“ продолжува.
Во меѓувреме, на јужната хемисфера на Земјата, морскиот мраз на Антарктикот го достигна својот летен минимум на почетокот на март. Бројката од 1,98 милиони квадратни километри е еквивалентна на онаа од 2022 и 2024 година и е втората најниска забележана површина на мраз на Антарктикот.
На глобално ниво, вклучувајќи ги Арктикот и Антарктикот, морскиот мраз паѓа на минимални годишни вредности во февруари. А според соопштението на Службата за климатски промени, овогодинашниот февруарски минимум за мраз во светот е најнизок забележан досега.
Иако природната варијабилност исто така игра одредена улога во губењето на морскиот мраз, температурите во регионите на Арктикот и Антарктикот се зголемуваат повеќе од светскиот просек од 1,2 степени, што придонесува за неговото рекордно повлекување.
