Случајот со смртта на легендарниот актер Џин Хекман и неговата сопруга Бетси Аракава станува сè покомплициран, откако лекарот на 65-годишната Аракава изнесе шокантни тврдења што драматично се косат со официјалните полициски извештаи.
Д-р Џосаја Чајлд, поранешен специјалист за итна медицинска помош, кој сега раководи приватна клиника во Санта Фе, изјави за „Мејл он сандеј“ дека Аракава ја контактирала неговата клиника 24 часа откако, според полициските извештаи, веќе била почината.
„Бетси Хекман не почина на 11 февруари, бидејќи ме повика на 12 февруари“, тврди д-р Чајлд, додавајќи дека неколку недели пред нејзината смрт таа се распрашувала за кардиолошки преглед за својот сопруг.
Според него, Аракава на 10 февруари ја откажала својата посета во клиниката поради здравствената состојба на Хекман, но повторно се јавила на 12 февруари и разговарала со еден од лекарите. Иако за истиот ден ѝ бил закажан нов термин, таа никогаш не се појавила.
Спротивно на овие тврдења, официјалната обдукција, спроведена од д-р Хедер Џарел, покажала дека Аракава починала на 11 февруари од хантавирусен белодробен синдром – ретка, но потенцијално смртоносна болест што ја пренесуваат глодари. Хекман, пак, починал една недела подоцна, на 18 февруари, од срцева слабост поврзана со хипертензија и атеросклероза, а Алцхајмеровата болест била значаен фактор во неговата смрт.
Телата на сопружниците биле пронајдени во различни простории од нивниот дом во Санта Фе – Аракава на подот во бањата, а Хекман во друга соба, со јасно видлив пејсмејкер. Обдукцијата покажала дека актерот немал храна во желудникот, што укажува дека можеби не бил свесен дека неговата сопруга починала. Трагично, еден од нивните кучиња, кое се опоравувало од операција, исто така угинало од глад и дехидрација.
Новите сознанија дополнително ја комплицираат распределбата на имотот на Хекмен, вреден 80 милиони долари. Според тестаментот, ако и двајцата сопружници починат во рок од 90 дена, целото богатство на Бетси ќе биде донирано во добротворни организации. Неговиот син, Кристофер, наводно ангажирал адвокат специјализиран за наследни спорови, што сугерира можни правни предизвици околу поделбата на имотот.
Додека официјалната истрага сè уште трае, новите детали ја прават оваа трагична приказна уште помистериозна.
