Индијците често уживаат во овој напиток во доцните попладневни часови. Овој ритуал е дел од нивната култура и има симболично значење – топлина, добредојде и заедништво. Затоа не е чудно што неговата популарност се проширила низ целиот свет, пишува „Живим“.

Зачини што му даваат посебна арома

Најчесто користени зачини во овој црн чај се каранфилче, кардамом, ѓумбир и црн бибер во зрно. Некои додаваат и ѕвездест анасон, семки од коморач или морско оревче. Се користи кравјо млеко, но може да се замени со растителни алтернативи како бадемово или сојно млеко. Ако избегнувате шеќер, чајот може да се заслади со мед или стевија. Богатството на овој чај лежи во хранливите состојки на зачините, кои се добри сојузници на здравјето:

Кардамом содржи витамини Ц, Б6, тиамин, рибофлавин, ниацин и минерали како калциум, магнезиум, фосфор, железо, цинк, бакар и манган.

Циметот е богат со антиоксиданси и има антиинфламаторни својства.

Каранфилчето ја подобрува дигестијата, помага при инфекции на дишните патишта, ја ублажува забоболката, уништува паразити и бактерии и делува како афродизијак.

Ѓумбирот се бори против мачнини, го поттикнува варењето и содржи гингероли, кои имаат антиинфламаторно, аналгетско, антиканцерогено и антипиретско дејство.

Црниот бибер содржи активна состојка пиперин, која помага при воспалени зглобови, ја намалува воспаленоста во дишните патишта предизвикана од астма и сезонски алергии и го поддржува здравјето на црниот дроб.

Морското оревче има силни антибактериски својства и позитивно влијае врз централниот нервен систем, намалувајќи го заморот и стресот.

Направете си сопствен масала чај

Состојки (за 2 шолји):

• 1 шолја вода (250 мл);

• 1 шолја млеко (250 мл);

• 2 лажички црн чај (или 2 вреќички црн чај);

• 1–2 лажици шеќер (или по вкус; може и мед).

Зачини:

• 4–5 зрна кардамом (ситно издробени);

• 1 стапче цимет (околу 5 см);

• 2–3 каранфилчиња;

• 1–2 парчиња свеж ѓумбир (или 1/2 лажичка сув ѓумбир во прав);

• 5–6 зрна црн бибер (лесно издробени);

• 1/4 лажичка морско оревче (по желба).

Начин на подготовка:

Во мало тенџере ставете вода и додадете ги издробените зачини (кардамом, цимет, каранфилче, црн бибер, ѓумбир и морско оревче). Варете на средна температура додека водата не зоврие и зачините не пуштат арома (околу 2–3 минути).

Кога водата ќе почне да врие, додадете го црниот чај. Намалете ја температурата и варете уште 2–3 минути за да ги впие аромите од зачините.

Потоа додадете го млекото и шеќерот. Промешајте и варете на тивок оган уште 3–5 минути. Внимавајте млекото да не преврие.

Процедете го чајот низ ситна цедалка за да ги отстраните зачините и листовите од чајот.

Послужете топло во шолји. По желба, додадете уште шеќер или млеко по вкус и уживајте во топлиот и ароматичен масала чај.