Алисе Оглетри, 36-годишната мајка од Тексас постави нов светски рекорд за најголема количина мајчино млеко донирана од поединец, објави Гинисовата книга на рекорди. Оваа мајка на три деца донирала неверојатни 2.645,58 литри мајчино млеко до јули 2023 година, соборувајќи го сопствениот рекорд од 2014 година.
Тогаш, кога првпат го постави светскиот рекорд, донираше 1.569,76 литри. Таа ги испратила сите донации во „Банката за мајчино млеко“ во Северен Тексас, а уште повеќе мајчино млеко, кое не било пресметано во официјалниот резултат, го донирала на блиски пријатели и на банката за млеко „Мали богатства“.
Таа со своите донации им помогна на повеќе од 350 илјади предвремено родени бебиња. На прашањето кој е нејзиниот омилен дел од донирањето мајчино млеко, Оглетри рече дека „знае дека им помага на другите“.
„Имам големо срце. На крајот на денот, немам многу пари за да продолжам да донирам затоа што имам семејство за издржување. Ако проценката е точна, помогнав на повеќе од 350.000 бебиња“, изјавила Оглетри за Гинисовата книга на рекорди.
Нејзината приказна започнала во 2010 година кога го родила својот прв син, кој сега има четиринаесет години. Таа тогаш не знаела дека има можност да донира мајчино млеко, сè до моментот кога сфатила дека произведува повеќе млеко од вообичаено.
„Премногу произведував и фрлав мајчино млеко, несвесна дека хиперпродукцијата е единствена и дека другите мајки се мачат со недоволно млеко. Нашиот прв син Кајл беше во болница, а јас го полнев замрзнувачот во собата на медицинската сестра. Медицинската сестра ме праша дали некогаш сум размислувала да донирам, што дотогаш не ми падна на памет и така дознав за таа можност. На крајот донирав сè што имав заштедено дотогаш и продолжив да донирам некое време“, објаснила таа.
Инаку, таа продолжила да донира и по раѓањето на другите два сина, и откако еднаш била сурогат мајка.
