Два авиона на филипинските воздухопловни сили се судрија за време на тренажен лет и се урнаа во воена воздухопловна база јужно од Манила. Во несреќата загинаа сите четворица пилоти, соопштија филипинските власти.

Двата авиона „СФ-260“ се судриле вчера попладне за време на лет на мала височина, по што се урнале во воздухопловната база „Фернандо“, во градот Липа, во крајбрежната покраина Батангас, јужно од главниот град Манила.

Во несреќата нема повредени лица на копно, соопштија официјални претставници.

Филипинските воздухопловни сили не објавија детали за причините за несреќата, која ја опишаа како несреќен случај. Двајца филипински функционери запознаени со настанот изјавиле дека авионите се судриле во воздухот. Тие зборувале под услов на анонимност, бидејќи немале овластување јавно да коментираат за случајот.

Според сведок кој зборувал за Асошиејтед прес, еден од двата двоседи се урнал во близина на касарна во која престојуваат припадници на војската во рамките на воздухопловната база.

По несреќата, филипинските воздухопловни сили привремено ги приземјиле сите преостанати авиони од типот „СФ-260“, произведени во Италија, додека трае истрагата. Не е соопштено колку вакви авиони сè уште се во употреба.

Серија несреќи со истиот тип авиони

Ова не е прва несреќа со авион „СФ-260“ на Филипините. Во мај годинава, еден таков авион се урнал за време на тренажен навигациски лет во планинската покраина Бенгет, на северот на земјата. Летал со уште неколку авиони од истиот тип, а во несреќата загинале двајцата пилоти.

Во 2023 година, друг авион „СФ-260“ се урнал на оризово поле во покраината Батаан, северозападно од Манила, за време на тренажен лет. И тогаш загинале двајцата членови на екипажот.

Најновата несреќа се случува во период кога филипинската војска со години се соочува со недостиг од финансиски средства за модернизација на својата опрема.

Поради буџетските ограничувања, земјата има тешкотии во обновувањето на воздухопловните сили, морнарицата и копнената војска. Истовремено, Филипините се соочуваат со долгогодишни комунистички и муслимански бунтовнички движења, како и со сè поизразени територијални спорови со Пекинг во Јужното Кинеско Море.