Во Словачка започнаа локалните и регионалните избори на кои гласаат 4,41 милион граѓани, со цел да се изберат локални и регионални претставници, градоначалници и членови на различни совети.
Избирачките места во Словачка утрово се отворија во 7 часот за локалните и регионалните избори, на кои граѓаните ќе избираат градоначалници, општински и градски советници, како и претседатели и членови на регионалните власти. Гласањето ќе трае до 20 часот.
Право на глас имаат речиси 4,41 милион луѓе, а изборите се спроведуваат на 6.029 избирачки места во 2.926 општини, градови и градски четврти.
Покрај локалните и регионалните претставници, во Братислава и Кошице се избираат и претседатели на градските четврти и членови на нивните совети.
Мандатот на избраните функционери трае четири години. Граѓаните можат да гласаат само во местото во кое имаат пријавено постојано живеалиште.
Право на глас, покрај полнолетните државјани на Словачка, имаат и странски државјани кои имаат постојано живеалиште во земјата.
