По четири години мир во северниот регион Тиграј, Северна Етиопија повторно е зафатена од жестоки борби меѓу регионалните сили и федералната влада. Новоизбувнатите конфликти го прекршуваат мировниот договор од 2022 година и вклучуваат сојуз на вооружени групи против владата на премиерот Абиј Ахмед.
Лидерите на северниот етиопски регион Тиграј соопштија дека влегле во нова војна со федералната влада, откако избувнаа борби во Тиграј и во два соседни региони, со што е нарушен мировниот договор постигнат пред четири години.
Граѓанската војна од 2020 до 2022 година меѓу Народноослободителниот фронт на Тиграј (ТПЛФ) и федералните сили резултираше со стотици илјади жртви, пред во ноември 2022 година да биде потпишан Договорот од Преторија.
Новите борби следуваат по повеќемесечно растечко непријателство меѓу двете страни, кое кулминираше со неделното соопштение дека ТПЛФ формирал сојуз со уште шест вооружени групи од различни делови на Етиопија, со цел соборување на владата на премиерот Абиј Ахмед.
„По интензивирањето на инвазијата што на различни начини ја спроведува автократскиот и геноциден режим на Просперитет на Абиј Ахмед против народот на Тиграј... Регионалната влада на Тиграј соопшти дека на силите на Тиграј им е наредено да го одбијат нападот и дека влегле во одбранбена војна“, се наведува во соопштението на регионалната администрација предводена од ТПЛФ.
Гетачев Реда, советник на Абиј и поранешен функционер на ТПЛФ, напиша на платформата Икс дека ТПЛФ ја презел контролата врз аеродромите во Тиграј кои биле под федерална контрола и започнал „сеопфатна офанзива“ врз владините позиции во соседните региони Афар и Амхара.
„Етиопијан ерлајнс“ ги суспендираше летовите кон регионот.
Четири извори, меѓу кои висок функционер на етиопската влада, дипломатски извор, хуманитарен извор и извор поврзан со ТПЛФ и сојузничка милиција, ги потврдија случувањата во Тиграј, Афар и Амхара.
Тие наведоа дека во Афар силите на Тиграј се борат заедно со локална вооружена група, додека во Амхара се борат заедно со милицијата Фано.
Фано за време на војната од 2020 до 2022 година беше на страната на федералната влада, но во 2023 година крена бунт против неа. Групата е членка на новиот сојуз со ТПЛФ.
Портпаролите на Абиј, федералната влада и ТПЛФ не одговориле веднаш на барањата за коментар. Федералната влада го обвинува ТПЛФ дека го прекршува Договорот од Преторија и дека се обидува да предизвика хаос.
Портпаролката на Абиј, Билене Сејум, изјави дека членовите на новоформираниот сојуз веќе соработувале со финансиска поддршка од соседна Еритреја, која е историски противник на Етиопија.
Еритреја повеќепати ги негираше обвинувањата дека поддржува вооружени групи во Етиопија. Министерот за информации одби да ги коментира најновите случувања.
