Говорот на грчката европратеничка Афродити Латинопулу стана вирален на социјалните мрежи откако, за време на дебатата за состојбата на Европската Унија, ја обвини Урсула фон дер Лајен дека е „најголемиот расист кон Европејците“.

Латинопулу, лидерка на партијата Глас на разумот и европратеничка од групата Патриоти за Европа, зборуваше нешто повеќе од една минута во Стразбур. Потоа ја објави снимката на мрежата „X“ со пораката: „Госпоѓо фон дер Лајен, не постои поголем расист кон Европејците од вас!“

Латинопулу ја обвини Европската комисија дека ја полни Европа со илегални мигранти и ги уништува локалните заедници.

Тоа е нејзин долгогодишен став што го застапува во Стразбур – затворени граници, укинување на поволностите за илегални влезови и масовно враќање на мигрантите. Таа тврди дека државите на првата линија, како Грција, ги сносат трошоците, додека Брисел им држи лекции за вредностите.

Во говорот за состојбата на ЕУ, Урсула фон дер Лајен се осврна и на прашањето за границите. Таа не го прифати начинот на кој Латинопулу зборуваше за темата, претставувајќи ги миграциите како контролиран безбедносен и политички предизвик, а не како проект на елитите насочен против Европејците.

Која е Афродити Латинопулу?

Атрактивната 35-годишна политичарка, родена во Солун во семејство на свештеник, не е ново име во политиката. Уште во 2022 година беше исфрлена од владејачката партија Нова демократија на Киријакос Мицотакис.

Причината беа нејзините коментари за лицата со прекумерна телесна тежина, кои беа оценети како дискриминаторски.

Латинопулу е и жесток противник на абортусот и миграцијата, а се залага и припадниците на ЛГБТК+ заедницата да немаат право да работат во образовниот систем на Грција.

Таа се спротивставува на отворените граници, високите даноци и укинувањето на традиционалните општествени структури.

Остро ги критикуваше организациите Thessaloniki Pride и Rainbow Families поради настан на кој „драг кралици“ читале божиќни приказни пред деца од предучилишна и основношколска возраст.

„Тие не се стручни лица, ниту каков било пример за да им се обраќаат на мали деца. Трагично е ова што се случува и сите мора да реагираме“, порача Афродити, додавајќи: „Подалеку рацете од нашите деца!“

Низа контроверзии

Контроверзиите што ја следат дополнително се засилија пред три години, кога на нејзината тогашна партија ѝ беше одбиена регистрацијата за локалните избори.

Имено, Врховниот суд одлучи дека партијата Патрида – Афродити Латинопулу не може да учествува на изборите поради спор околу самиот назив.

Судот едногласно ја прифати тужбата на пратеникот Константинос Богданос, чија партија Патриотски сили за промени е позната по кратенката „Патрида“. Кога Богданос, поранешен пратеник на Нова демократија, ја основа Патрида во септември 2022 година, ја именува Латинопулу за своја заменичка. Иако подоцна ја исфрли од партијата, таа формира нова политичка опција под името Патрида – Афродити Латинопулу.

На крајот, влезот во Европскиот парламент го избори како лидерка на партијата Глас на разумот.

Дополнително внимание привлече и за време на изборниот викенд, кога на социјалните мрежи објави видео во кое држи лубеница, копирајќи го хумористичното видео на италијанската премиерка Џорџа Мелони со две дињи во рацете.

Од живот во куќата на баба ѝ до плата од 82.000 евра

Пред да влезе во политиката, Афродити се занимавала со тенис, но нејзиниот најдобар пласман бил 1.067 место на светската ранг-листа. Студирала на Правниот факултет при Универзитетот Аристотел во Солун, каде што дипломирала во 2017 година. Пред изборот за европратеничка работела како адвокатка.

Според пишувањето на „To Vima“, Афродити во 2023 година пријавила приход од само 3.000 евра и навела дека не поседува никаква недвижност, објаснувајќи дека живее во куќата на својата баба.

Само една година подоцна, како европратеничка, нејзиниот годишен приход надминува 82.000 евра, а добила и стан од 61 квадратен метар во Солун како подарок од своите родители.