Според податоците на осигурителната компанија „Allianz“, во Германија секоја година во сообраќајни несреќи се оштетуваат околу 870.000 фарови.
Истовремено, просечната цена на еден фар се зголемила од 708 евра во 2015 година на дури 1.251 евро во 2025 година, додека кај поединечни модели цената достигнува и до 6.700 евра.
Причината лежи во сè посложената технологија. Денешните фарови користат „Matrix LED“ системи, ласерско осветлување, адаптивни светла и напредна електроника, па дури и најмалите оштетувања можат да доведат до исклучително скапи поправки.
Од „Allianz“ сметаат дека проблемот не е во технологијата, туку во начинот на кој производителите ги решаваат поправките, пренесува „b92“.
Во многу случаи не е можно да се замени само оштетеното стакло, куќиштето или електронскиот модул, туку се заменува целиот фар, што значително ги зголемува трошоците и за возачите и за осигурителните компании.
Како позитивен пример се наведува „Toyota“, кај која кај одредени модели е можно одделно да се заменат стаклото, куќиштето, електронските компоненти и држачите на фарот.
По сличен пат тргна и „Mercedes-Benz“, кој планира идните фарови да ги конструира со помош на завртки, наместо со лепило, со цел поправките да бидат поедноставни и поевтини.
Покрај пониските трошоци, можноста за поправка наместо целосна замена би донела и еколошки придобивки, бидејќи би се намалила количината на електронски отпад и емисијата на јаглерод диоксид при производството на нови делови.
