Рафаел Ходар во петокот во пет сетови го совлада Американецот Алекс Микелсен и избори пласман во осминафиналето на Ролан Гарос, но освен за победата, светските медиуми пишуваа и за „валканиот потег“ на 19-годишниот Шпанец.
Имено, дел од јавноста го обвини дека во еден момент, при заминувањето кон соблекувалната, нервозата ја истурил врз девојче задолжено за собирање топчиња, туркајќи ја кон оградата.
Се чини дека приказната сепак е малку поинаква. Иако на првата снимка изгледа дека Ходар недвосмислено ја турка девојката, забавените кадри укажуваат дека станува збор за „оптичка измама“.
Ходар, имено, му фрлил шише вода на својот татко на трибините, а потоа му сигнализирал нешто со раката. Девојката во истиот момент забрзано се движела наназад, а се чини и дека се сопнала на левото стапало на Ходар, но сепак успеала да ја задржи рамнотежата.
Бидејќи во достапниот кадар шпанскиот тенисер со своето тело го покрива поголемиот дел од телото на девојчето задолжено за собирање топчиња, навистина изгледа како да ја турнал. Меѓутоа, подоцна и самиот ја објаснил ситуацијата.
„Не ја ни допрев. Не, не, не, никогаш не би можел да направам такво нешто. Не ја турнав, ниту нешто слично. Му сигнализирав на татко ми да ми донесе некои реквизити пред паузата за тоалет, за да ги земам кога ќе се враќам. Девојката одеше наназад, мислам дека навистина за малку ќе паднеше на земја, но не затоа што јас ја турнав“, објаснил Ходар, кој на прв поглед можеби ги згрозил присутните, но се чини дека сепак без товарот на осуда може да се подготвува за мечот против својот сонародник Пабло Карењо Буста.
