Кап д’Агд на југот на Франција со години важи за најголемо натуристичко населено место во светот, но во последните години внимание привлекуваат извештаите за растот на бројот на свингери.
Важно е да се образложи разликата меѓу нудизмот и натуризмот. Нудизмот означува практика на престој без облека, најчесто поради удобност, рекреација или чувство на слобода. Фокусот е на самиот чин на голотија, на пример капење на нудистичка плажа или престој во нудистички камп.
Натуризмот е поширок поим. Тој вклучува голотија, но и одредена филозофија на живот: прифаќање на телото, поврзаност со природата, ненаметнување на сексуалноста, меѓусебно почитување и често поздрав или поедноставен стил на живот. Натуристите обично нагласуваат дека голотијата не е сексуална, туку природна.
Сместен на околу еден час возење од Монпелје, Кап д’Агд е самоодржливо натуристичко населено место во рамки на поголем туристички комплекс, со приватна плажа долга околу два километри. Посетителите за време на престојот можат речиси сѐ да извршуваат голи, додека облеката е задолжителна дури при излегување во блиските градови Агд и Пезенас, наведува „Metro“.
Ресортот секоја година привлекува повеќе од 12 милиони ноќевања, а во шпицот на сезоната прима околу 45.000 гости дневно. Влезот во натуристичкото село е регулиран, па посетителите при пристигнувањето пополнуваат формулар и добиваат картичка за пристап. Правилата наложуваат почитување на хигиената, забрана за комуницирање со повишен тон и фотографирање други лица, како и забрана за гласно однесување, порнографски активности и воајеризам, за кој е предвидена казна до 15.000 евра.
Сепак, поранешната жителка Барбара, Британка која некогаш живеела на ова место, а денес таму ги поминува летата, тврди дека свингерите сега сочинуваат околу 40 проценти од клиентелата. Таа вели и дека полицијата во текот на летото постојано ја надгледува плажата. И покрај тоа, наведува дека не гледа „судир“ меѓу натуристите и свингерите и тврди дека живеат во хармонија.
Впечатоците на посетителите се поделени. Дел од гостите предупредуваат дека ова место повеќе не нуди „традиционален натуристички одмор“, додека други го опишуваат како најзабавна дестинација за возрасни. Понудата на сместување се движи од камп и мобилни куќички до хотели и резиденции за парови, а цените се движат од 20 до 659 евра за ноќ, во зависност од видот на сместувањето.
