Десет дена пред нападите на САД и Израел врз Иран да го втурнат регионот во војна, Трамп беше домаќин на конференција во Вашингтон на која земјите од Персискиот залив ветија милијарди долари за управување и обнова на Газа по двете години израелско уништување
Одборот за мир на американскиот претседател Доналд Трамп доби само дел од 17-те милијарди долари ветени за обновата на Појасот Газа, што го спречи американскиот претседател да продолжи со својот план за иднината на разорената палестинска енклава, објави агенцијата Reuters повикувајќи се на извори.
Десет дена пред нападите на САД и Израел врз Иран да го втурнат регионот во војна, Трамп беше домаќин на конференција во Вашингтон на која земјите од Персискиот залив ветија милијарди долари за управување и обнова на Газа по двете години израелско уништување.
Планот предвидува обемна реконструкција на крајбрежниот појас по разоружувањето на палестинската милитантна групација Хамас, чии напади врз Израел ја поттикнаа војната во Газа, како и по целосното повлекување на израелските трупи.
Ветените средства се наменети и за финансирање на активностите на новоформираниот Национален комитет за управување со Газа (NCAG), група палестински технократи поддржана од САД, која треба да ја преземе контролата врз Газа од Хамас.
Одборот за мир негираше проблеми со финансирањето во соопштението на социјалните медиуми во петокот, по сторијата на Reuters.
„Одборот за мир е мала организација фокусирана на имплементација која собира средства по потреба. Нема ограничувања за финансирање. До денес, сите барања за финансирање се исполнети брзо и во целост“, се вели во соопштението.
Претставниците на NCAG не одговориле веднаш на барањето за коментар.
Еден извор, лице со директно познавање на работата на Одборот за мир, изјавил дека од десетте земји коишто ветија средства, само три – Обединетите Арапски Емирати, Мароко и самите САД – всушност извршиле какви и да се уплати.
Изворот реколе дека досега се собрани помалку од милијарда долари, но не дал дополнителни детали. Војната со Иран „влијае на сè“, влошувајќи ги претходните тешкотии со финансирањето, рекол изворот.
NCAG не може да влезе во Газа поради финансиски и безбедносни проблеми, додал тој. Дури и откако беше договорено примирје ланскиот октомври, израелските напади убија најмалку 700 луѓе во Газа, според здравствените службеници, додека во нападите на милитантите загинаа четворица израелски војници, според Израел.
Друг извор, палестински функционер запознаен со ситуацијата, рекол дека Одборот ги информирал Хамас и другите палестински фракции дека NCAG во моментов не може да влезе во Газа поради недостиг од средства.
„Во моментов нема достапни пари“, рекол изворот, цитирајќи го претставникот на одборот, поранешниот бугарски дипломат Николај Младенов, кој ги информирал палестинските групи.
Хамас постојано повторува дека е подготвен да го предаде управувањето на NCAG.
Обновата на Газа, каде што четири петтини од зградите се уништени за време на двегодишното израелско бомбардирање, се проценува од глобалните институции дека ќе чини околу 70 милијарди долари.
