Израелските напади врз Иран ги таргетираат службите за внатрешна безбедност како дел од стратегијата на премиерот Бенјамин Нетанјаху за дестабилизација на владата и поттикнување на народно востание.
Израел веќе го ликвидираше врховниот лидер на Иран, ајатолахот Али Хамнеи, а во вторник, 17 март 2026 година, објави атентат врз највисокиот безбедносен функционер на земјата, Али Лариџани. Покрај тоа, израелската армија интензивно ги бомбардира безбедносните сили, кои потиснаа голем број антивладини протести, пишува The New York Times.
Премиерот Нетанјаху рече дека воздушната кампања на Израел нанесува „разорни удари“ на безбедносниот апарат на Иран и создава „оптимални“ услови за Иранците да ја соборат својата влада.
„Се обраќам на иранскиот народ. Се ближи моментот кога ќе можете да се залагате за вашата слобода. Ние сме со вас и ви помагаме. Но, на крајот, тоа зависи од вас“, рече Нетанјаху на прес-конференција минатата недела.
Но, дури и ако Израел успее значително да ги ослаби внатрешните сили на Иран, нема гаранција дека противниците на владата повторно ќе се кренат откако властите брутално ги потиснаа протестите во декември 2025 и јануари 2026 година, при што загинаа илјадници.
Иако Израел и САД изразија желба да постават основа за промена на режимот на почетокот на војната, американскиот претседател Доналд Трамп минатата недела призна дека народното востание не изгледа неизбежно.
„Тие им велат: ‘Ако се побуните, ќе ве убиеме на улица’. Мислам дека тоа е огромна пречка за луѓето кои немаат оружје“, изјави тој за „Фокс њуз“ во петокот.
Трамп е исто така лицето кое веројатно ќе одлучи за времетраењето на војната. Од друга страна, шефот на иранската полиција Ахмадреза Радан се закани со остра одмазда против секој што ќе се осмели да протестира.
„Отсега, ако некој дејствува по наредба на непријателот, повеќе нема да го сметаме за демонстрант. Ќе го сметаме за непријатели и ќе се однесуваме кон него како кон непријатели“, рече тој претходно овој месец. Дека владата сè уште има влијание врз дел од населението покажа и митингот против САД и Израел, каде што се собраа илјадници луѓе во петокот, на 13 март.
