Босанскиот авантурист Роберт Дацешин на социјалните мрежи сподели интересен факт за Мавританија, поточно за жените во оваа земја, кои се „особено ценети“ ако се разведени, па дури постои и пазар на разведени жени. Причината за тоа лежи во древните берберски обичаи.
Имено, Дацешин во едно видео запраша: „Дали знаевте дека разведените жени можеби се најпосакуваните жени во Мавританија и дека постои пазар на разведени жени?“.
Тој објасни дека причината е тоа што кога жената ќе се разведе од својот сопруг, целиот имот и сè што стекнале за време на бракот ѝ припаѓа нејзе.
Се верува дека Мавританија има една од највисоките стапки на развод во светот, иако официјалните податоци се неусогласени бидејќи многу бракови никогаш формално не се регистрираат. Земјата, исламска република со правен систем заснован на шеријатското право, своите релативно либерални ставови кон разводот ги должи на древните берберски обичаи.
Истражувачот на културна антропологија во Куќата на хуманистичките науки во Париз, Елхаџ Улд Брахим, објаснил за списанието „The Observer“ дека разведените жени во мавританската култура се слават, па дури и се идеализираат.
Како што рекол со генерации мавританските поети ги романтизирале разведените жени како заводнички, ослободени од будното око на своите родители и од ограничувањата на бракот.
Во оваа земја сопругот може усно да се откаже од својата сопруга, додека жената може да побара развод само во ограничени околности, најчесто ако нејзиниот сопруг е насилен или неверен. Споровите околу пари и старателство над децата често завршуваат на суд, каде што мнозинството судии се мажи, а пресудите обично одат во корист на мажите.
И покрај тоа, жените ретко го напуштаат бракот без ништо. Според традицијата, содржината на домаќинството се префрла на жената по разводот.
„Срамота е мажот да го земе имотот“, рекол Улд Брахим. „Сè што ја опремува куќата ѝ припаѓа на жената, дури и ако мажот го купил“, истакнал тој.
Овој обичај најјасно се гледа на „marché des divorcées“, односно „пазарот на разведени жени“ во Нуакшот. Долж широк и прашлив пат, жените продаваат натрупани предмети од своите бракови. Фрижидери и теписи, чајници и тенџериња, столчиња и софи наредени во високи, нестабилни купишта. Трговците се жени, многу од нив разведени повеќепати, кои исто така купуваат стока од штотуку разведени сопруги. Такси возила застануваат во редовни интервали со душеци и рамки од кревети врзани на покривите.
Се вели дека мажи од целиот Нуакшот доаѓаат на пазарот на разведени жени во потрага по сопруга која веќе била мажена и се разведувала неколку пати.
